Hello，大家好，我哋係由韓國人每日提供最新韓國旅行資訊嘅Creatrip。
韓國越嚟越多外國人嚟玩、留學，甚至工作，當大家遇到韓國人，通常都會被佢哋問幾個問題⋯⋯小編身為香港人，第一次聽到呢啲問題真係好唔慣，可能最係韓國同香港嘅文化差異啦！唔知大家又點睇呢？
外國人喺韓國經常被問到嘅問題
1. 幾多歲？
眾所周知，韓國人好著重輩份，所以百分之90嘅韓國人都會問你幾多歲，去決定要點樣稱呼對方。年齡一向都係女人嘅秘密，喺香港真係好少好少會俾人問到年齡，所以嚟度韓國第一次被人問起，會覺得有少少尷尬⋯⋯
加上，韓國人會計虛數，00年出世，今年就已經22歲，聽落會老啲。
2. 你有冇女/男朋友？
朋友之間問有冇男女朋友一啲都唔出奇！不過喺韓國，第一次見都好，韓國人就會問「有冇男/女朋友？」對外國人嚟講，呢個問題好多時都會有啲尷尬，因為真係唔會第一次見就問得咁「深入」。尤其好似小編一樣單身嘅朋友嚟講⋯⋯問完之後就會dead air。（答有就會延伸去另一半做啲咩、點樣識之類）
3. 結咗婚未？
如果你嘅歲數比較大少少，韓國人可能就唔會問「有冇男/女朋友？」，而係直接問「結咗婚未？」。可能，部份韓國人會覺得到某一個年記就應該要結婚（？）。小編覺得呢個問題真係好尷尬⋯⋯
4. 家族史
「你父母做咩？」、「有幾多兄弟姐妹？」、「兄弟姐妹做緊咩？」等等都係韓國人成日問嘅問題。小編覺得第一次見就問，好似太深入，喺香港，就算識咗一年嘅朋友都未必知對方父母返咩工⋯⋯
5. 你喺韓國做咩㗎？
呢個係另一個成日會問嘅問題。韓國人好想知道點解外國人會嚟韓國，嚟到韓國又會做啲咩。亞洲人可能會少啲比人問到，但係對西方人嚟講，就應該成日會被人問呢條問題。喺韓國（尤其係老一輩）眼中，呢啲嚟自歐洲、美洲甚至非洲嘅外國人，都離韓國好遠，佢哋會好奇外國人嚟到咁遠嘅韓國做咩？
6. 唔熱/凍呢？
韓國凍嘅天氣會持續超過6個月，但一到夏天又會好熱。韓國人成日都會問小編：「熱？香港唔係熱過韓國咩？」其實小編覺得一樣咁熱⋯⋯小編一啲嚟自歐美嘅朋友，佢哋嘅國家一年四季都都凍，就會被韓國人問「唔凍呢？你哋國家應該仲凍啦！」小編回頭望一望朋友身上三層冷衫，哈哈！
韓國人好多時都會問以上呢啲問題，大家可能會覺得尷尬，但其實佢哋並唔係要問啲咩，可能只係開個話題、了解下你咁。唔知大家又有冇遇過被韓國人問呢啲問題呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
