Hello，大家好，我哋係由韓國人每日提供最新韓國旅行資訊嘅Creatrip。
韓國全國機場工人宣佈由2025年9月19日開始進行警告性罷工，中秋連假期間更加有機會升級至全面大罷工，到時候可能會嚴重影響仁川機場出入境同航班運作？一齊睇吓發生咩事啦！
唔想排長龍或者miss咗班機？
參考仁川機場人流狀況預測圖安排時間啦！
韓國機場宣佈罷工
조선일보
由民主勞總公共運輸工會仁川機場地區支部同全國機場工會組成嘅「全國機場工人聯合會」9月9號喺首爾龍山總統辦公室前舉行記者會，正式宣佈即將罷工，訴求包括改善輪班制度、增聘人手、取消不公平合約同改革低薪結構等。
仁川機場地區支部長表示，單係上年就有5名仁川機場員工因工作而喪生。而現時大約有1萬位子公司工人，當中超過6千人仍然採用「三班制」，長期面臨過勞風險。雖然公社職員早喺2007年已經轉用「四班三輪制」，但基層勞工嘅制度一直都未有改善。
뉴스1
公共運輸工會副委員長強調，呢班工人係以間接形式僱用，長期受母公司推卸責任同子公司削減成本壓力影響，導致低薪同就業結構唔穩定。佢呼籲仁川機場要即刻推行四班制改革，並且有人手短缺時要及時補充。
全國機場工人聯合會提出四大訴求如下：
- 杜絕連續夜班，立即補充人手
- 廢除壓低工資嘅中標率制度
- 停止母公司同子公司之間不公平合約，成立勞資共同協議會
- 建立全國機場工人團結體系，打造安全機場
工會表示，如果訴求得唔到正面回應，會喺9月19日開始喺仁川機場第二客運大樓進行警告罷工，中秋連假期間（10月3日至10月12日，包括開天節同韓文節連假）會全面升級成總罷工。
呢個行動可能會嚴重影響仁川機場出入境同全韓國航空運輸秩序，準備前往韓國旅行嘅遊客要密切留意最新消息。
因為仁川機場係香港同韓國之間最主要出入境渠道，如果罷工擴大，可能會出現航班延誤、地勤服務不足、行李處理延遲等情況（原則上今次係機場人員罷工，唔係航空公司空中服務員罷工，所以航班一般唔會取消，但好大機會會delay）。
建議計劃中秋連假飛韓國玩嘅朋友們要提前確認航班狀況，隨時留意航空公司同仁川國際機場官方消息，避免行程受影響。
경향신문
目前韓國政府同機場都未有針對罷工事件公佈具體應對方案。業界擔心如果真係全面停工，會對國際旅遊旺季同航空業造成嚴重影響。
唔想排長龍或者miss咗班機？
參考仁川機場人流狀況預測圖安排時間啦！
如果你對文章內容有咩意見或者想查詢更多資訊，可以隨時喺留言區留言，或者透過電郵(help@creatrip.com)聯絡客戶服務中心。想知更多韓國最新資訊，記住follow埋我哋嘅Instagram同Threads啦！
