Hello，大家好，我哋係由韓國人話你知每日最新韓國資訊嘅Creatrip。
＃韓國文化＃宗教
＃韓國宗教＃特定信仰
韓國嘅宗教類別五花八門，一般媒體報導同大眾認知都認為韓國主要信仰係基督教，但其實事實並唔係咁。
根據調查結果顯示，韓國有50%以上嘅人係無宗教信仰，點解會咁嘅呢？一齊嚟睇下啦。
✨馬上Follow我哋IG
instagram.com/creatrip.hk
韓國宗教文化
韓國人信仰宗教比例
來源：Quora
根據2015年韓國蓋洛普每十年進行一次嘅宗教調查結果顯示，1,500名調查者入面有56.9%表示自己冇信仰，而其他約43%有特定信仰，佔最多嘅係基督教（19.7%），其次係佛教（15.5%）。
呢個調查結果相當有趣，一直以嚟大家普遍認為韓國人絕大多數都係信基督教，其他就係以傳統地方宗教同佛教。
𣎴過呢份調查結果出爐之後，大家先知道其實韓國人並冇想像中咁熱衷於宗教信仰，到底點解呢？咁就要講基督教喺韓國發展嘅歷史。
1950至1953年韓戰開打之前，原本喺北方嘅基督教人士，為咗逃難跑到南方（因為喺北方宗教係唔合法），去到南方嘅人聚集埋一齊，成為初階嘅「教會文化」。
而經過韓戰嘅摧殘，內心無助嘅人聚集埋一齊，透過宗教嘅力量令彼此解脫、獲得心靈慰藉。
所以喺韓戰之後嘅韓國，基督教信徒嘅數量亦都隨之暴增，最終演變成現今韓國各地教會林立，信徒者眾。
不過韓戰過後嘅世代，對於宗教冇咁大嘅冀望，亦因此喺年齡分層入面，信宗教嘅年輕人都越嚟越少，20代只剩31%，30代只剩38%仲係有固定信仰。
韓國宗教文化
點解年輕人唔再信教？
令新一代年輕人唔再積極信仰宗教嘅原因，係因為比起過去嘅世代，現今嘅教育水平提升，大眾接受高等教育，加上佢哋亦都覺得參加宗教活動好曬時間。
喺統計數據入面發現，初中嘅信仰比例為63%，而高中係54%，大學更加只剩得41%。
呢個結果顯示，喺日益激烈嘅競爭環境入面，無論係生活、學習定係工作都佔咗日常生活大部分時間，參與宗教活動時間就會越嚟越少。
尤其對學生嚟講，比起喺教會去禱告、聚會，佢哋寧願用同樣嘅時間去玩或者休息。
好多人出咗社會都會因為太忙而遠離宗教，或者係唔再固定參加宗教活動，大部分嘅時間都會想嚟shopping或者休息。
韓國宗教文化
同政治都有關係？
雖然韓國係儒家思想為主，但教會勢力可以話係延伸到政治同經濟層面。
經過日本殖民時期，親日嘅韓國人，同大部分韓國人、教會分子不合，因此去親近美國，成為咗十分信仰基督教嘅一群人，後來入咗政治階層。
到而家佢哋仍然係政治主流份子，現任政府同其他人對呢啲教會所產生嘅問題，都係隻眼開隻眼閉。
呢個都係點解政府邊個都可以得罪，就係唔可以得罪財閥同宗教團體，比起其他事韓國宗教權力有幾大可以話係超乎想像。
另外，基督教都有獻金（捐獻）嘅習慣，絕大部分都係睇自己心意同能力，冇特別強求。
不過喺韓國好多教會係派放一個袋，俾大家輪流放錢。
韓國社會有個「睇其他人眼色」嘅風氣，喺咁樣嘅壓力之下，幾乎同強迫性繳納冇咩分別。
呢啲獻金到底用去邊冇人知，好嘅教會真係會實質上幫助其他人，或者去做有意義嘅事，但有啲惡質教會獻金會直接入自己袋，俾自己嘅小朋友出國讀書，甚至變成政治人物嘅政治獻金。
呢種宗教文化令好多年輕人覺得有壓力，加上越嚟越多教會同政商勾結嘅新聞傳出，直接導致年輕人對信仰卻步。
韓國宗教文化
LGBT同宗教嘅關係？
新一代無信仰變多嘅原因，有一部分係嚟自於宗教對同性戀弱勢族群嘅打壓。
年輕一代堅信每個人都係平等，但係喺基督教入面，同性戀係一種罪過。
對年輕人嚟講其實都算係一個衝擊，即使多數韓國人心入面唔係咁接受同性戀，但比起直接以宗教進行攻擊、輿論戰嘅方式，仍然令好多人無辦法接受。
韓國宗教文化
疫情下嘅韓國宗教
韓國新冠肺炎疫情嘅三波爆發點，其中有兩次都係因為宗教而引起。
大邱新天地教會或者係首爾嘅愛心第一教會，以及先前多次傳出嘅宗教群聚感染等等，都令社會對宗教信仰再次感到卻步。
而喺疫情中都可以睇到，企喺街上遊行嘅宗教份子好多都係中老年人，反而年輕人嘅比例就大大減少，可以睇得出年輕世代對於信仰嘅堅持，已經唔再似上一個世代咁執著。
唔知道呢個調查結果同介紹，有冇重新顛覆大家對韓國宗教嘅想法呢？
雖然宗教本身嘅立意係好，令人能夠喺委屈或傷心嘅時候搵到重新振作嘅力量，但對韓國人嚟講宗教已經成為特定團體把持嘅工具，似乎違背咗原來嘅意義，亦因為咁年輕世代同越嚟越多韓國人，都選擇唔再信仰任何宗教。
✨馬上Follow我哋IG
instagram.com/creatrip.hk
| 其他延伸閱讀 | |
 韓國喪禮文化 |  韓國同性戀文化 |
