Hello，大家好，我哋係由韓國人話你知每日最新韓國資訊嘅Creatrip。
＃韓國文化＃喪禮
＃韓國喪禮＃韓國葬禮
喪禮喺每個地方都有唔同嘅習俗，不過大致嘅意味都係悼念死者、安慰生者嘅儀式。
而韓國作為亞洲國家，同香港都有好唔同嘅喪禮文化。
今日就等小編同大家介紹一下，通常正係喺韓劇出現嘅韓國喪禮、喪禮要注意嘅禮儀同埋程序。
✨馬上Follow我哋IG
instagram.com/creatrip.hk
韓國喪禮文化
韓國喪禮氣氛唔會特別壓抑
韓國喪禮嘅特徵之一就係氣氛唔會太壓抑，就算大家仍然會喊，不過整體氣氛都唔會淨係濃罩住悲傷同抑鬱，更加偏向慎重。
小編就會由呢點開始向大家介紹韓國喪禮同其他國家唔同嘅地方。
1. 參加唔熟嘅人嘅喪禮？
韓國人覺得喪禮並唔單止紀念逝去嘅故人，仲係一種聯繫遠親同舊識嘅儀式，所以就算係唔係好熟嘅人嘅喪禮，例如高中同學嘅嫲嫲過生佢哋都會抽時間去參加。
香港人多數會因為好忙抽唔到時間到場，而且唔係好熟嘅人，最多打電話關心下。
不過韓國人就覺得，認識嘅人佢嘅家屬離世，代表仍然在生嘅人要接替佢哋嘅位置，為傷心嘅朋友、親人帶來一啲安慰。
韓國喪禮嘅意義並唔係單單為故人準備，更加係要陪留低嘅人。
2. 喪禮現場會出現花牌同酒？
喺韓國喪禮入面，仲可以見到好多人打花牌同飲酒傾計。
香港人可能會覺得喺喪禮入面做呢啲事好唔尊重死者，但其實呢個就係韓國係喪禮文化。
喺韓國，喪禮大概維持3日就會結束，喺呢3日入面，死者嘅家屬同朋友因為忙住接待嚟悼念嘅人，成日都要捱夜，而因為身心俱疲但又要繼續隨時接待，所以會一邊打牌保持清醒。
喺接待嘅場合（唔係焚香、置棺嘅地方）有好多人，亦都有人係嚟自好遠嘅地方，所以仲會準備啲酒水同食物，一齊打花牌、飲酒，消磨時間。
3. 韓國嘅喪禮現場仲有飯食？
韓國殯儀館會提供簡單嘅飯菜，家屬可以用食物向嚟悼念死者嘅親戚、朋友表達感激。
無論有幾忙幾趕，去參加喪禮嘅韓國人都一定會坐低食餐飯，除咗表示慰問仲可以同傷心嘅家屬傾下計，開解佢哋嘅悲傷情緒。
喪禮嘅食物多數都會有辣牛肉湯、煎餅、白切豬肉同水果等，連韓國米酒都有。
4.韓國葬禮現場會唱歡樂嘅歌曲？
雖然喪禮唔係喜事，反而就係因為喪禮係代表悲傷同壓抑嘅儀式，所以為咗安慰死者家屬，韓國自古東萊歷史文化入面就有一個名為「喪輿（다시래기）」嘅習俗。
喺喪禮入面，啲村民為咗安慰家屬，就會講啲有趣嘅事同埋唱歌，內容都係「呢間屋入面有喜事，入嚟玩吓啊」呢種完全唔切合喪禮氣氛嘅句子。
香港人嘅喪禮多數都係會誦經或者要照顧情緒不穩嘅家屬，但韓國自古以來嘅喪禮文化可以睇得出，韓國人係會努力戰勝悲傷。
雖然喺而家嘅韓國喪禮入面已經無咗唱歌呢種文化，只係作為文化遺產保留，但係唔好令生者孤獨嘅理念就仲有保留落嚟。
喺韓劇《我的大叔》入面都有個情景，至安因為嫲嫲過生，獨自守靈好孤獨，尚勳就叫咗啲朋友嚟，為原本安靜、孤獨嘅喪禮會場增添熱鬧嘅氣氛，亦都安慰咗因為至親離世而獨自一個人非常傷心嘅至安。
喺呢到都可以見到，對於韓國人嚟講，比起安靜嘅喪禮場合，比較熱鬧人多嘅氣氛更加可以安慰到生者。
韓國葬禮嘅小細節
大家可能會好奇，韓國喪禮嘅一啲細節同香港係咪類似？
參加韓國喪禮要著咩？點樣打招呼？帛金幾時畀？呢啲小細節小編下面都會同大家介紹。
1. 韓國帛金（弔唁金 / 조의금）
韓國喪禮忌諱帛金俾雙數，所以通常俾3、5、7、10萬韓元（以3+7萬嘅方式）。
因為通脹問題，通常最少都會俾5萬韓元（唔熟嘅話），如果係好熟嘅朋友嘅屋企人過生，一般至少俾10萬韓元甚至更多。
定好金額之後，就要用個白色信封裝住，信封面要寫返啱嘅字先係正確嘅禮儀。
正面除咗寫賻儀之外，仲要寫漢字嘅謹弔（부조）、追慕（추모）、追悼（추도）、哀悼（애도）、慰靈（위령）。
背面就係打直寫返參加喪禮嘅人（畀帛金嘅人）個名，而要為故人祈求冥福就可以喺右邊寫啲字句。
最後，按照韓國喪禮傳統，弔唁金（帛金）係入殯儀館鞠躬、同守靈人打完招呼之後先畀。
不過最近都有係殯儀館入口簽名畀帛金嘅地方。
2. 韓國葬禮上嘅穿著？
喪禮入面嘅遺屬都係著黑色正裝，男人要喺右手臂套袖章，代表係喪主嘅身份；女人就要戴白色蝴蝶結髮夾。
另外，韓國無白頭人唔可以送黑頭人嘅習俗，但係父母為仔女送終都係令人相當心碎同埋不孝嘅行為；小朋友同孕婦就要盡量避免參加喪禮。
至於佢參加喪禮嘅人都需要著黑色正裝，女性著裙嘅話就要著埋黑色絲襪、長襪等等，男性都係要著黑襪避免露出面、手以外嘅皮膚。
3. 韓國喪禮上嘅行禮
入去焚香所（靈柩），同家屬有簡單嘅注目禮之後，喺留言簿寫低自己個名同遞交弔唁金。
另外，呢個時候絕對唔可以握手，因為握手有喜慶嘅意思，記得全部都要以鞠躬代替。
最後就要喺遺照前面焚香或者獻花，完成之後喺死者嘅遺照前面進行跪拜大禮。
將雙手打平喺雙眼嘅高度，然後慢慢彎腰、趴低，向死者行兩次大禮就可以，絕對唔可以行三叩頭大禮，因為三磕頭跪拜大禮係對父母嘅大禮。
韓國喪禮嘅日程
韓國喪禮嘅日程好短，主要淨係會進行3日，之後就會火化，將骨灰裝喺骨灰盅入面送返畀家屬。
火葬儀式通常淨係得家屬參加，所以頭兩日嘅喪禮，絕大多數韓國人都會盡量抽時間去參加安慰遺屬。
同香港頭七之後出殯嘅文化唔同，韓國喪禮無「七」嘅文化，所有喪禮程序都會喺呢3日完成。
如果係信奉佛教嘅家庭，大部分程序都會按照一般韓國喪禮儀式，但49日之後就會進行「49祭」嘅活動，將死者所有物品、衫全部燒曬，等喺陰間嘅故人唔好再留戀人間，同電影《與神同行》嘅劇情類似。
以上就係韓國嘅喪禮文化，同香港係咪好大分別？
小編其實幾認同韓國呢方面嘅理念：送別逝去嘅故人固然重要，但係安慰仲在生嘅人更加唔可以忽視。
同埋殉葬儀式嘅流傳都一定有佢嘅意義，禮節最好要做足。
希望呢篇文章可以令大家喺第二個角度了解韓國，下次再同大家分享其它韓國文化。
✨馬上Follow我哋IG
instagram.com/creatrip.hk
| 其他延伸閱讀 | |
 韓國算命文化 |  出席韓國婚禮 |
