Hello，大家好，我哋係由韓國人每日提供最新韓國旅行資訊嘅Creatrip。
生得靚就贏一半？喺韓國社會，外貌係非常重要嘅一環。係咪生得靚、好睇就會成功呢？韓國人對外貌嘅標準有啲咩？今日小編會帶大家睇下韓國社會嘅外表嘅睇法。
韓國社會外貌價值
好多韓國人，尤其係新一代，會覺得好嘅外表可以為佢哋帶嚟成功。例如：搵工嘅時候，CV上面張相靚啲，獲錄取嘅機會會大啲⋯⋯所以，韓國人由高中開始就好著重外表，佢哋會化妝或整容，甚至有韓國人嘅生日或者考完大學嘅禮物係一次整容手術。
對一般嚟講，整容係個人選擇，為嘅係自我滿足，甚至可以建立自信。不過喺韓國，靚已經成為一種社會標準，每個人都被迫接受同跟從呢個標準。韓國覺得夠瘦、V面、直眉、大眼⋯⋯等等，就係靚嘅標準。
韓國外貌標準嘅影響
每個人都想自己外表好睇，更可以打扮成自己嘅風格。不過韓國社會受到媒體同娛樂圈嘅影響，一般人對外表嘅標準都係嚟自藝人。
調查發現，韓國女性比其他國家更容易對自己外表唔滿意或者唔自信。係咩原因令韓國年輕一代咁花心機管理外表呢？搵工嘅時候，外表又有幾重要？有啲公司喺求職申職表上會要求貼相、填身高體重⋯⋯
韓國搵工唔容易，公司會希望職員都係畢業於名牌大學、經驗夠多，更對佢哋嘅外表有一定要求。小編嘅朋友假期嘅時候去搵過兼職，有一間Cafe直情喺招聘廣告上寫明「靚仔/靚女會先考慮」⋯⋯
唔一樣嘅「美」
韓國社會好容易會用外表去判斷一個人嘅價值，甚至仲有韓國人會覺得黑人係壞人，而白人會受佢哋優待。小編有一位黑人朋友，經常受到異樣嘅目光，更被人講閒話（通常係老一輩），佢試過向一位韓國朋友表白，一開始被拒絕，因為韓國朋友擔心一齊之後會被人指指點點⋯⋯
每個人嘅外表都係獨一無二，有啲人生得高啲、有人生得矮啲；有人白皮膚、有人黃皮膚⋯⋯韓國仲有部份人會用自己嘅標準去衡量其他人，甚至會有外表去揀朋友。
韓國人著重外表，所以好多藝人都喺外貌、身材上受到無情嘅批評。不論藝人唱歌有幾好、跳舞有幾勁，只要佢哋嘅外表唔符合社會標準，就會受到批評，所以有藝人會地獄式減肥，甚至整容。
呢種標準會灌輸落韓國年輕一代身上，佢哋不期然就會跟住呢種標準去改變自己嘅外表。
每個人都想自己生得好睇，但要記住每個人都可以活出自己一套靚嘅標準。Be Yourself！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
