韓國旅遊常見問題

Hello，大家好，我哋係由韓國人每日提供最新韓國旅行資訊嘅Creatrip。

相信睇緊呢篇文嘅朋友們好多都係第一次飛韓國玩，今次小編整理咗一系列好多人喺嚟韓國之前都會問嘅問題，希望可以幫到大家啦！

韓國旅遊常見問題

1. 幾時最去啱韓國玩？

韓國其實除咗梅雨季（通常係6~7月）同7-8月天氣會好熱之外，其實全年都好啱去四圍玩，特別係好多人會春天專程嚟睇櫻花，秋天就會嚟睇紅葉，冬天就會去睇雪+滑雪。不過小編個人覺得2月同11月就冇咩特別，其他時候飛韓國玩會開心啲..？

大家可以參考以下每月天氣同穿搭小貼士，開始準備你嘅韓國之旅！

韓國各月份天氣&穿搭小貼士💡

2. 如果搭直航航班可以去到邊幾個韓國機場？

而家香港飛韓國嘅直航機有去仁川機場（最common+最近首爾）、清州機場、大邱機場、釜山金海機場同濟州機場，所有韓國主要城市都可以輕鬆去到，大家安排行程都更加方便！

你可能會有興趣👇🏻

[블로그] 仁川機場總整理

[블로그] 2025清州機場交通/設施/換錢/退稅總整理

3. 去韓國旅行需唔需要整簽證？

如果係短期旅行（90日內），香港護照持有人可以免簽證入境韓國，不過根據韓國駐港領事館嘅指引，護照有效期最少需要有6個月以上，如果就到期嘅話記住要續咗護照先啦！

4. 去韓國需唔需要帶轉插？

韓國插頭係用圓柱兩腳插頭（插頭腳直徑係4.7mm），嚟旅行嘅時候記住要帶轉插！另外因為韓國電壓同香港電壓一樣係220V，所以都可以自己帶風筒同直髮夾去，如果有需要亦都可以喺機場租幾日美髮工具用，咁就唔洗自己帶咁阻埞啦！

[스팟] 仁川機場美髮工具儀器租借服務

5. 如果買機票唔小心將姓同名調轉咗點算？

通常（以航空公司為準）LAST NAME係姓氏，FIRST NAME係名；或者FAMILY NAME係姓、GIVEN NAME係名，大家請注意順序。大細楷都冇咩影響，不過大多數訂票網站都會直接預設大楷，同時唔會俾你輸入空格。如果只係姓氏同名調轉咗，「通常」改都係唔使錢（建議直接打去問），但如果係打錯字，就有可能會收費。

6. 入境韓國嘅時候有咩唔可以帶？

飛韓國嘅時候所有生肉、加工肉類、新鮮海鮮、水果、蔬菜、種子、部分乳製品都唔可以帶，2025年開始更加禁止帶日本EVE止痛藥，大家記住要注意！

另外而家乘搭韓國航空公司航班嘅時候，所有乘客登機前都需要將行動電源同電子煙攞出嚟，放入密實袋/膠袋入面，或者用絕緣膠布貼住充電位（以免接觸到其他金屬），然後隨身攞住或者放喺座位下面。

你可能會有興趣👇🏻

[블로그] 3月1日起韓國實行登機行動電源最新規定

7. 去到機場要點出首爾市區？

由仁川機場去首爾市區嘅話，大家可以搭普通機場鐵路、機場快線AREX同機場巴士，或者如果同行人士比較多嘅話，另外預約定機場包車服務可能會更加抵！如果係去其他機場，通常都會係搭機場巴士，大家可以參考以下兩篇文章！

[블로그] 仁川機場交通攻略 | 來回市區方法&比較

[블로그] 全韓機場巴士整理

8. 夜晚10點到仁川機場，仲有冇地鐵可以搭？

※23:50有多班車由仁川T2出發，但尾站係數碼科技城，唔會去弘大、首爾

有時候搭比較夜嘅航班都會擔心冇車搭去首爾，但其實23:30前去到地鐵站月台都可以成功搭到尾班列車！通常落機、入境、拎行李大概需要一個鐘左右，如果唔會延誤，22:00到韓國都應該仲會有地鐵，但如果22:30之後到就未必趕到啦。

如果你之前已經有先辦理自動通關，入境會快好多。但如果真係會遲過11點到埗，建議大家揀其他交通工具去首爾！

你可能會有興趣👇🏻

[블로그] 韓國E道「SeS自動通關」教學&注意事項

[블로그] 2025仁川機場夜間交通攻略

9. 好晏先會到首爾，到時會唔會換唔到錢？

首爾匯率最好嘅找換店一定係明洞大使館同換錢咖啡廳（舊一品香找換店），呢兩間營業時間通常會去到20:00至21:00（每日都會有啲變動），如果你係19:00先到仁川機場，要去換基本上係趕唔切，建議大家可以先喺機場換定少少，或者如果大家住宿係喺明洞/弘大附近，可以去搵Money Box 24小時無人換錢機，就算好遲先到，都唔怕冇錢用！

10. 旅行期間唔換現金齋用信用卡得唔得？

韓國比起現金，大部份人都會揀碌卡，不過喺外國碌卡嘅話匯率未必靚，而且仲會有手續費，另外好似傳統市場同明洞街邊小食攤檔都未必收卡，所以建議大家準備少少現金以備不時之需。

另外如果大家如果冇可以喺海外付款嘅信用卡，推薦大家買定遊客都用得嘅交通&扣賬卡，咁就唔洗攞住咁多現金咁麻煩啦！

[스팟] 仁川機場外幣→韓幣換錢服務（送BELLYGOM聯名交通卡）

[스팟] NAMANE卡 | 自製韓國交通&扣賬卡/韓國旅行必備

[스팟] [免年費] Hanpass Go-Card | 外國人專用扣賬&交通卡

11. 找換店可唔可以用其他外幣換？細金額又換唔換得？

目前韓國最普遍係可以用美金、日元、人民幣、台幣、港幣、星幣等換韓幣，相對比較冷門嘅澳幣、泰銖、英鎊、歐元就未必間間可以換到。至於面額細嘅紙幣，基本上係可以換，但有啲鋪頭未必會收，同時匯率亦有可能會有少少唔一樣。

你可能會有興趣👇🏻

[블로그] 2025韓國換錢總整理

12. 一定要買交通卡？

交通卡唔係強制一定要買，不過買咗會好方便好多，因為平時搭一次都要準備散紙，但有咗呢張卡就唔使煩，仲可以享有轉乘優惠。最common嘅交通卡係「T-Money」同「Cashbee」，喺首爾、釜山、仁川、大邱用係通行無阻，搭巴士、的士、地鐵都用得，但要注意Cashbee喺大田用唔到。

2024年首爾政府更加推出咗一款叫「氣候同行卡」嘅公共交通工具定期使用券，指定日數內可以無限搭地鐵同巴士，而家更加有埋短期乘車券，遊客都可以享有呢個優惠啦！

你可能會有興趣👇🏻

[블로그] 韓國交通卡總整理

[블로그] 首爾無限地鐵巴士乘車券「氣候同行卡/Climate Card」

13. 韓國大眾交通可唔可以食嘢？

首爾巴士係禁止飲食，只要司機見到大家手拎住飲品同食物，都已經會禁止上車，除非係有袋袋住，或者係保溫杯先得。地鐵、火車雖然冇限制範圍，但建議大家都唔好食啲重口味嘅嘢，以免打擾到其他乘客。而機場巴士原則上冇限制（仁川出發），但建議都係唔好帶食物上車會比較好。

14. 諗住行超市，點知佢休息？

香港超市好少會休息，不過喺韓國，政府就有定韓國超市每個月都一定要有休息日，我哋每個月都會有更新，有需要去嘅朋友都可以參考一吓！

你可能會有興趣👇🏻

[블로그] 7月韓國超市/百貨公司休息日

15. 可唔可以自己一個去韓國餐廳食飯？

可能大家成日聽到韓國好多餐廳都要叫2人份起，所以大家都會擔心自己一個飛韓國，未必有啖好食，不過大家又唔需要太擔心，除咗一啲打邊爐嘅鋪頭同燒肉店之外，大家都可以自己一個人去食。

你可能會有興趣👇🏻

[블로그] 首爾一人餐廳推介

16. 韓國好多Cafe都唔俾小朋友去？

KOL打卡Cafe、天台Cafe、動物Cafe等可能會禁止小童入場，因為怕可能會打擾到其他人，如果家長要帶小朋友去，可能要留意清楚，鋪頭出面/入面有冇寫到「NO KIDS ZONE」，如果有標明嘅話就真係唔入得。

17. 觀光客係唔係好易俾人呃？

觀光景點物價通常都會比較高，有啲鋪頭可能仲會俾唔同Menu俾韓國人同外國人，甚至係份量都唔同，建議大家去之前可以先比吓價，同時入去講幾句韓文，等職員覺得唔係咁易蝦。

18. 可唔可以喺街邊食煙？

喺韓國原則上係唔可以周街食煙，亦都會另外設有吸煙區。大家如果見到有금연（禁煙）字眼就代表嗰度唔可以食煙，一旦被揭發需要支付罰款。

19. 可唔可以帶泡菜同即食麵返香港？

不過唔同海關做法都唔一樣，如果大家唔肯定帶唔帶到，返香港時直接去海關申報就最安全。

20. 韓國退稅可以喺邊度搞？

韓國退稅有兩種方式，一種係買完後出境前喺機場進行退稅，另一種係買完之後喺鋪頭直接搞退稅。好似Olive Young等大型連鎖店都可以即場退稅，現場會有自助退稅機，大家記住要搞完退稅先走啦。

你可能會有興趣👇🏻

[블로그] 韓國退稅總整理

呢次小編整理咗唔少人嚟韓國都會問嘅問題，如果大家仲有好奇嘅部分，或者有嘢想知，歡迎留言話俾我哋知，我哋會盡量解答大家：）

如果你對文章內容有咩意見或者想查詢更多資訊，可以隨時喺留言區留言，或者透過電郵(help@creatrip.com)聯絡客戶服務中心。想知更多韓國最新資訊，記住follow埋我哋嘅Instagram同Threads啦！