Hello，大家好，我哋係由韓國人每日提供最新韓國旅行資訊嘅Creatrip。
韓國冬天真係好凍，由12月開始氣溫不斷跌，到底韓國人係點度過嚴寒嘅呢？今日就等小編介紹幾樣韓國冬天必備物品同韓國人禦寒方法俾大家啦！
韓國冬天有咩好玩？
[블로그] 2024首爾聖誕打卡景點
韓國人冬天必備物品&禦寒方法
電熱地氈
相信大家應該都有聽過韓國冬天會開地暖，不過其實因為地暖係用煤氣，所以長期開嘅話每個月煤氣費真係勁金...呢個時候好多韓國人都會選擇買電熱地氈！
市面上嘅電熱地氈價錢有平有貴，₩50,000~₩300,000不等，不過通常比較平嘅通常都會冇咁安全，而且如果面料阻隔唔到電磁波，更加有可能會對身體有害，所以好多人都會轉用熱水墊，不過就相對上冇咁方便。
電熱氈
電熱氈係頭先介紹嘅電熱地氈嘅縮細(?)版，通常韓國人都會用嚟鋪床或者沙發，價錢都會比較平，對一個人住嘅朋友們嚟講係過冬必備物品之一！不過用嘅時候要避免低溫燙傷，亦都要記住用完要熄，如果唔係有機會會導致火災！
泡泡紙
연합뉴스
喺香港泡泡紙通常都係用嚟包禮物或者易碎物品，不過韓國人就會用嚟痴喺窗度，一方面可以阻隔外來視線，另一方面可以幫助擋風，封住所有風可以攝入室內嘅罅隙。
雖然好多人話如果咁做會完全唔通風，對身體唔好，不過真係寧願貼定廢事凍親XD
暖包
暖包就唔洗小編多講啦XD 無論係香港定韓國，天氣凍嘅時候梗係要開返個暖包用！如果大家喺香港唔記得買定過嚟，大家可以喺Daiso或者便利店就輕鬆買到！大家記住要小心唔好放喺袋或者直接接觸太耐，如果唔係好容易會燙傷。
長版羽絨
韓國呢幾年都好流行著長羽絨，除咗因為而家好多長羽絨版型夠靚，最重要係因為可以包住成個人同擋到更多風，所以比起短版羽絨保暖效果更加好，入面只要著普通衫就得！
浸溫泉/去汗蒸幕
韓國雖然唔係一個以溫泉而聞名嘅國家，不過好似江華島等地都有溫泉可以浸。除此之外，韓國人冬天亦都經常會去汗蒸幕避寒，推薦大家去體驗韓國汗蒸幕文化，過返溫暖又充實嘅一日
食人參補身
韓國人相信「以熱治熱」，所以夏天最熱嘅時候都會食人蔘雞補身，當然去到冬天，人參補品、人蔘雞等等嘅食物都可以發揮佢嘅功效，令身體發熱！（而且有咩好食過凍冰冰嘅時候飲嘅一碗暖湯啊~
飲酒
韓國人凍嘅時候都鍾意飲酒，令身體更加暖，不過有科學證明話其實飲酒係呃緊自己嘅感官，而且萬一飲醉咗瞓喺條街度就更加容易令體溫急降！
以上係韓國人冬天必備嘅物品同佢哋嘅禦寒方法，大家自己有又咩保暖小秘訣呢？
如果有更多想知嘅內容，都可以隨時留言或者dm話俾我哋知：）
Mail：help@creatrip.com
