Hello，大家好，我哋係由韓國人每日提供最新韓國旅行資訊嘅Creatrip。
最近見到好多朋友飛韓國嘅時候都會考慮去韓國牙科洗牙、漂牙或者做瓷牙貼片等牙齒美容療程，但始終牙科屬於醫療嘅一部分，就算知道價錢平，但網上資訊唔多，令大家都會卻步。今日小編幫大家整理出經常都會收到有關韓國牙科療程嘅問題，希望可以解答到大家嘅疑惑，一齊用最少錢打造最自信嘅笑容啦！
韓國牙科療程常見問題FAQ
韓國洗牙常見問題&迷思
[블로그] 韓國洗牙療程介紹/價錢/推薦診所
Q1. 洗牙要幾耐做一次？
A：一般建議每6個月至1年做一次，如果你會食煙或者容易積牙石，建議每3至6個月做一次（就算箍緊牙、冇任何牙齒問題都建議定期洗牙！）
Q2. 外國遊客喺韓國洗牙有冇得退稅？
A：洗牙屬於唔可以退稅嘅牙齒療程，無法進行退稅。
Q3. 洗牙要幾耐？
A：一般需要20-40分鐘，不過如果牙石多或者牙齦唔好，可能就需要更長時間。
Q4. 孕婦或者有糖尿病可唔可以洗牙？
A：可以，其實孕婦因為荷爾蒙變化，更容易有牙齦問題，另外因為牙齦發炎會影響全身健康，所以糖尿病患者亦需要定期洗牙，比起一般人要洗得更密。不過洗牙之前記得同醫生講清楚自己係孕婦或者有糖尿病，等醫生幫你評估同安排。
Q5. 洗牙會唔會好痛或者出血？
A：痛唔痛要睇你嘅牙齦狀態同有幾多牙石。如果牙石比較多或者牙齦發炎，可能會短暫覺得唔舒服或者酸痛，甚至可能會輕微出血，但大部分情況下都唔會話好痛。如果有需要可以要求牙醫幫你做局部麻醉。
Q6. 洗牙之後牙齒會鬆動，牙罅仲會變大？
A：洗牙其實唔會令牙齒鬆或者令牙罅變大，只係可能因為牙罅本身有牙石塞住咗，清走之後會覺得牙齦腫或者有空位，過一排就會自然恢復。
Q7. 洗完牙之後會令牙齒更加敏感？
A：洗完牙之後原本俾牙石遮住嘅位會露出嚟，所以可能會短暫覺得牙齒變得敏感，一般幾日到幾星期就會好轉。
Q8. 洗牙會唔會令牙齒變白？
A：洗牙可以去除部分牙漬，令牙齒顏色睇落變白少少，但唔好期望有明顯美白效果。
Q9. 聽講洗牙會令牙齦變差？
A：完全錯曬！洗牙係保護牙齦最重要嘅治療。有啲人覺得洗完牙之後牙齦好似變短咗咁，但其實只係清走咗牙石，原本塞住咗嘅位露返出嚟，而唔係因為牙齦萎縮。反而唔洗牙先會令牙齦狀態會越嚟越差！
Q10. 洗完牙之後有咩需要注意？
A：洗牙後一兩日牙齦可能會比較敏感，最好避免食刺激性食物（辣嘢、熱嘢等）、飲酒同食煙。另外建議比平時更認真刷牙，記得用埋牙線或者牙縫刷，持續做好牙齒護理，保護牙齒健康。
韓國漂牙/牙齒美白常見問題&迷思
[블로그] 韓國漂牙/牙齒美白方法大解析
Q1. 牙齒美白療程對所有人都有用？
A：漂牙對大部分有色素沉澱問題嘅牙齒都有效，但如果天生牙色較深，或者因為食過四環素等抗生素導致嚴重變色，效果可能有限。
Q2. 有蛀牙或者牙齦病都可以漂牙？
A：如果有蛀牙或者牙齦炎，建議先做完相關治療好先再做美白療程，因為發炎嘅時候漂牙可能會令情況惡化！
Q3. 懷孕或哺乳期間可唔可以做牙齒美白？
A：雖然冇證據話會影響胎兒或BB，但安全起見唔建議懷孕或哺乳期間漂牙。
Q4. 牙齒美白會唔會傷牙？
A：牙齒美白療程只會分解牙齒表面色素，唔會破壞牙齒結構或者磨走牙齒。雖然美白過程中有機會短暫牙齒敏感，但過一排就會恢復正常。如果牙齒酸痛症狀一直冇好轉，可以用敏感牙齒專用牙膏減輕症狀，或者搵牙醫開專用藥或者再做氟素處理。
Q5. 美白前一定要洗牙嗎？
A：係，做牙齒美白前要先洗牙，清走牙石同牙菌膜，美白劑先可以均勻滲入牙齒，令效果更顯著。
Q6. 家用牙齒美白劑同去牙科診所做漂牙有咩分別？
A：牙科診所用嘅係高濃度美白劑同專業光線，效果快又明顯，而且係由專業人士監督同進行，會更加安全；家用牙齒美白劑濃度會比較低，需要不斷keep住做先會慢慢見到效果。
Q7. 見到通常預約都寫住「3次」，即係要分3次去做？
A：如果寫明「3次」，通常都係同一日幫你做曬，牙醫會重複「搽美白劑→照燈」呢個步驟3次，做完成個療程之後牙齒就會白2-3度！
Q8. 美白效果可以維持幾耐？
A：視乎你飲食同生活習慣，一般可以維持1至2年。定期護理同補做美白療程可以延長效果。
Q9. 美白後有咩食物要避免？
A：美白後48小時內牙齒容易染色，最好避免咖啡、可樂、紅酒、咖喱等色素重嘅食物，亦都儘量唔好食煙。
Q10. 喺韓國漂牙可唔可以退稅？
A：需要視乎診所類型，建議向牙科查詢。如果可以記住俾錢嘅時候向職員出示護照！
韓國瓷牙貼片常見問題&迷思
[블로그] 韓國瓷牙貼片介紹/明星前後效果比較
Q1. 咩人啱做瓷牙貼片？
A：推薦牙齒顏色偏黃或者有永久性牙齒變色問題、門牙之間有罅隙，或者牙齒邊緣崩咗/形狀唔整齊、唔想箍牙但想短時間內令牙齒變得整齊同潔白嘅朋友們去做！
Q2. 傳統瓷牙貼片、ZERONATE同MINISH有咩分別？
A：全部都係喺牙齒表面貼一塊薄陶瓷片，但傳統瓷牙貼片相對上比較厚，而且需要磨走嘅牙齒會比較多。而ZERONATE同MINISH屬於「零磨牙陶瓷牙齒貼片」，幾乎唔需要削走牙齒，分別在於「牙齒修削量」同「貼片材料」。
Q3. 做瓷牙貼片係唔係要磨走好多本身嘅牙？
A：承上，傳統瓷牙貼片會磨多啲牙，但而家好多牙科都主打零磨牙/將磨牙步驟減到最少。ZERONATE同MINISH就算要磨牙，基本上只會磨0.1~0.2mm，幫你最大程度保留真牙。BTW磨太多牙會令牙齒變得敏感脆弱，甚至有神經損傷風險，所以如非必要，建議儘量揀零磨牙療程。
Q4. 做完會唔會牙齒敏感？
A：有機會短暫敏感，因為磨牙後牙齒內部會暴露，不過通常幾日後症狀就會舒緩，如果冇好轉就記住一定要去搵牙醫協助啦。
Q5. 瓷牙貼片通常可以用幾耐？
A：視乎你進食同保養方式，通常可以用到7~10年，冇爛冇崩或者冇變色就可以用更耐！建議去提供保固服務嘅牙科診所做瓷牙貼片，有咩問題都可以返診所解決。
Q6. 如果瓷牙貼片爛咗或甩咗點算？
A：記住即刻去牙科診所重貼或換新貼片，唔好自己格硬拆。
Q7. 可唔可以用瓷牙貼片代替箍牙？
A：如果牙齒少少唔齊或局部需要改善，可以用瓷牙貼片代替，不過如果牙齒太亂或有咬合等問題，建議照常箍牙。
Q8. 做完瓷牙貼片有咩要注意？
A：避免食太硬或太韌嘅嘢，唔好咬手指、筆等，更加要保持正確刷牙習慣，定期檢查。
Q9. 做完牙齒會唔會變色？
A：陶瓷材料基本唔會因咖啡、紅酒、咖喱等變色，但黏合劑位置有機會變色，要定期進行護理。
Q10. 之後想拆走瓷牙貼片得唔得？
A：可以，但如果之前磨咗好多牙，可能要再貼返或做其他牙齒修復治療。
以上係小編為大家整理嘅韓國牙齒美容療程同牙科診所體驗相關問答，希望可以幫到大家！如果有任何相關疑問，非常歡迎大家喺下面留言，集思廣益！
首爾邊幾間牙科診所值得信賴？
[블로그] 韓國牙科診所推薦&價錢
如果你對文章內容有咩意見或者想查詢更多資訊，可以隨時喺留言區留言，或者透過電郵(help@creatrip.com)聯絡客戶服務中心。想知更多韓國最新資訊，記住follow埋我哋嘅Instagram同Threads啦！
