Hello，大家好，我哋係由韓國人每日提供最新韓國旅行資訊嘅Creatrip。
唔知你對上一次去洗牙係幾時呢？香港人去到小學都有學童牙科保健服務，可以定期檢查口腔同洗牙，但係中學之後去到成人，就要自己出錢做，而且價錢都唔平，所以好難養成定期洗牙嘅習慣... 不過其實韓國洗牙平過香港好多，今日小編幫大家整理咗一連串同韓國洗牙有關嘅資訊，一齊養好把牙齒啦！
韓國洗牙療程總整理
點解要定期洗牙？
通常牙醫都會建議每6個月至1年要定期去洗牙，但係點解平時有定時刷牙都唔夠，仲要專登去牙科診所洗牙？
首先洗牙原理係用超聲波洗牙機等專業儀器清除牙齒表面同牙齦線下積聚嘅牙石同牙菌膜，進行全面清潔。其實就好似大家會定期去做臉部深層清潔同護膚療程咁，去除老廢物質，維持牙齒健康。如果牙石同牙菌膜不斷積聚，可能會導致以下問題：
1. 引發牙齦炎/牙周病
如果牙石積聚喺牙齒同牙肉之間，會令牙肉發炎，初期叫做牙齦炎，牙肉會變紅變腫。如果一直唔清理牙石或者進行治療，情況會惡化成嚴重牙周病，可能會生牙瘡，牙齦同牙槽骨亦會慢慢萎縮。
2. 牙齒鬆動及脫落
承上，牙周病唔單止會令牙肉腫痛，仲會令牙齒鬆動甚至脫落！如果冇做好口腔護理，發炎情況會持續，令牙齦同牙根分離，牙菌膜、牙石同食物殘渣就會不斷堆積，形成一個惡循環。最後會出現牙根蛀壞，甚至因為失去牙齦同牙槽骨支撐而開始鬆動，最後就會脫落。
3. 口臭問題
平時刷牙、用牙線都未必可以完全清除牙齒同牙肉之間嘅牙石同牙菌膜，加埋口腔入面滋生嘅細菌，會分解食物殘渣，產生難聞氣味。如果已經進化到牙齦炎，口腔入面會有更多細菌，導致口臭問題更嚴重！
4. 導致健康惡化
口腔入面嘅細菌會經血管進入身體其他部位，可能會令心臟病同糖尿病等慢性病發作風險更高，甚至令病情惡化。所以保持口腔健康唔單止係為咗牙齒，仲係保護整個身體健康嘅重要一環。
香港/韓國洗牙費用比較(2025年價錢)
香港 | |
| 公立醫院 | 免費 (要排期、需符合資格) |
| 私家診所 | 平均 HKD $800 - 1,500 |
韓國 | |
延世Uline牙科 （江南） | ₩60,000 (60000) |
延世GOOD DAY 牙科診所 （江南） | ₩100,000 (100000) |
MINISH牙科 （江南） | ₩100,000 (100000) |
通常喺香港洗牙都要去私家診所或者大型連鎖牙科中心（政府只有向一般公眾開放緊急服務），而私家診所價錢通常都唔平，所以好多人都唔會有定期去洗牙呢個習慣。不過大家可以睇到喺韓國洗牙平過香港30~60%！
[스팟] 延世Uline牙科（江南站店）
[스팟] 延世GOOD DAY牙科診所（江南店）
[스팟] MINISH牙科（江南）
洗牙常見問題&迷思
Q1. 洗牙要幾耐做一次？
A：一般建議每6個月至1年做一次，如果你會食煙或者容易積牙石，建議每3至6個月做一次（就算箍緊牙、冇任何牙齒問題都建議定期洗牙！）
Q2. 外國遊客喺韓國洗牙有冇得退稅？
A：洗牙唔屬於可以退稅嘅牙齒療程當中。
Q3. 洗牙要幾耐？
A：一般需要20-40分鐘，不過如果牙石多或者牙齦唔好，可能就需要更長時間。
Q4. 孕婦或者有糖尿病可唔可以洗牙？
A：可以，其實孕婦因為荷爾蒙變化，更容易有牙齦問題，另外因為牙齦發炎會影響全身健康，所以糖尿病患者亦需要定期洗牙，比起一般人要洗得更密。不過洗牙之前記得同醫生講清楚自己係孕婦或者有糖尿病，等醫生幫你評估同安排。
Q5. 洗牙會唔會好痛或者出血？
A：痛唔痛要睇你嘅牙齦狀態同有幾多牙石。如果牙石比較多或者牙齦發炎，可能會短暫覺得唔舒服或者酸痛，甚至可能會輕微出血，但大部分情況下都唔會話好痛。如果有需要可以要求牙醫幫你做局部麻醉。
Q6. 洗牙之後牙齒會鬆動，牙罅仲會變大？
A：洗牙其實唔會令牙齒鬆或者令牙罅變大，只係可能因為牙罅本身有牙石塞住咗，清走之後會覺得牙齦腫或者有空位，過一排就會自然恢復。
Q7. 洗完牙之後會令牙齒更加敏感？
A：洗完牙之後原本俾牙石遮住嘅位會露出嚟，所以可能會短暫覺得牙齒變得敏感，一般幾日到幾星期就會好轉。
Q8. 洗牙會唔會令牙齒變白？
A：洗牙可以去除部分牙漬，令牙齒顏色睇落變白少少，但唔好期望有明顯美白效果。
想做牙齒美白?👇🏻
[블로그] 韓國漂牙/牙齒美白方法大解析
Q9. 聽講洗牙會令牙齦變差？
A：完全錯曬！洗牙係保護牙齦最重要嘅治療。有啲人覺得洗完牙之後牙齦好似變短咗咁，但其實只係清走咗牙石，原本塞住咗嘅位露返出嚟，而唔係因為牙齦萎縮。反而唔洗牙先會令牙齦狀態會越嚟越差！
Q10. 洗完牙之後有咩需要注意？
A：洗牙後一兩日牙齦可能會比較敏感，最好避免食刺激性食物（辣嘢、熱嘢等）、飲酒同食煙。另外建議比平時更認真刷牙，記得用埋牙線或者牙縫刷，持續做好牙齒護理，保護牙齒健康。
牙齒都可以做SPA？(aka高級洗牙服務)
可能大家平時都會幫身體或者頭皮做SPA，但其實連牙齒都可以做SPA！位於江南嘅「MINISH牙科」提供一個叫「口腔SPA」嘅療程，由專業牙醫提供多達19個STEP嘅診療服務，幫你同時分析同預防蛀牙、牙周病、口臭等口腔疾病。
推薦人士✨
- 怕睇牙醫嘅你
- 想接受專業同系統化口腔護理嘅你
- 成日蛀牙嘅你
- 想改善同治療口臭問題嘅你
診療儀器✨
- Qraycam pro：應用定量光學技術之齲齒與牙菌斑診斷裝置
- Qrayview c：蛀牙診斷裝置
- Twin Breasor II：智慧口氣測量儀
- Phase-contrast microscope：口腔有害菌檢測設備
有興趣做口腔SPA?👇🏻
[스팟] MINISH牙科（江南）
以上係小編幫大家整理嘅韓國洗牙相關資訊，洗牙算係最簡單嘅牙齒療程之一，而且定期做先可以長期keep住牙齒健康！韓國洗牙平過香港咁多，而且牙科醫療技術夠先進，下次飛韓國不妨嚟做埋洗牙啦！
如果你對文章內容有咩意見或者想查詢更多資訊，可以隨時喺留言區留言，或者透過電郵(help@creatrip.com)聯絡客戶服務中心。想知更多韓國最新資訊，記住follow埋我哋嘅Instagram同Threads啦！
