代訂 | 首爾泡菜文化體驗館

Hello，大家好，我哋係由韓國人每日提供最新韓國旅行資訊嘅Creatrip。

講起韓國嘅嘢食，當然唔少得泡菜（辛奇）啦！大家又有冇諗過可以自己親手整嚟食呢？其實喺首爾就已經有一個「泡菜文化體驗館」可以俾大家去試整泡菜！鍾意煮嘢食，或者鍾意食泡菜嘅朋友，有時間不妨可以去體驗吓~

撳我睇價錢&預約詳情👇🏻

[스팟] 首爾泡菜文化體驗館

「首爾泡菜文化體驗館」資訊

• 地址：서울 종로구 경희궁 3나길 24
• 營業日期：逢星期二休館

「首爾泡菜文化體驗館」推薦理由

• 有機會跟有超過10年整泡菜經驗嘅導師學點整呢種韓國人每日都會食嘅小菜，就算係韓國人都未必有試過。
• 透過親身體驗整泡菜，瞭解韓國飲食文化，加深對韓國嘅認識。
• 除咗泡菜，仲可以試食泡菜煎餅，一石二鳥！

「首爾泡菜文化體驗館」體驗詳情

1. 一般課程

• 課程內容：品茶 + 製作泡菜（白菜泡菜 700~900g）+ 試食泡菜煎餅
• 舉辦時間：

2. 特別課程（泡菜專家培養課程）

• 課程內容：品茶 + 製作泡菜（白菜泡菜 700~800g、鮮辣泡菜 300~500g、包肉泡菜 300~400g、青瓜泡菜 約300g、蘿蔔泡菜 約500g）+ 試食泡菜煎餅 + 頒發泡菜文化體驗課程證書
• 舉辦時間：

「首爾泡菜文化體驗館」介紹

韓國人食飯當然唔少得泡菜！嚟韓國旅行想做啲特別啲嘅嘢，不如嚟「首爾泡菜文化體驗館」親手整韓國傳統泡菜啦！

呢度所有體驗都需要預約，體驗當日去到現場就會發現職員已經幫大家準備好材料同工具，只要洗個手就可以開始整泡菜啦！

著住韓服嘅老師會詳細同大家講解整泡菜嘅方法，雖然主要都會用韓文，但亦都會夾雜英文同日文。大家有需要嘅話可以搵識講英文同日文嘅現場助理幫手，唔需要擔心聽唔明。

김치문화체험관 홈페이지

整白菜泡菜嘅時候，首先將白蘿蔔切成絲，加入醬料撈勻之後，再將佢搽落白菜度，最後將泡菜包好就可以等佢慢慢發酵。

而參加特別課程（泡菜專家培養課程）嘅朋友們仲會整埋鮮辣泡菜、包肉泡菜 、青瓜泡菜同蘿蔔泡菜，非常多樣化。

김치문화체험관 홈페이지

職員會幫大家將整好嘅泡菜真空包裝，方便大家帶返屋企食。

整完泡菜之後，大家就可以去試食泡菜煎餅，外脆內軟，非常香口！

小編早前親自去咗「首爾泡菜文化體驗館」學整泡菜，不如跟住小編一齊睇吓實際情況啦！

「首爾泡菜文化體驗館」位於一間傳統韓屋入面，可以喺咁有傳統氣息嘅地方學整泡菜，真係令人好期待啊！

入到韓屋入面，就會見到老師已經準備好曬材料。呢度每次可以容納到20位學生，空間都算大，而且非常企理。

整嘢食除咗味道之外，衛生都非常重要，洗完手就可以正式上堂啦！

首先老師會用5分鐘簡單講吓整泡菜所需要嘅材料同步驟，老師會用英文或者日文講解，大家唔需要擔心聽唔明。老師仲話呢度嘅食材全部都非常新鮮，所以整出嚟嘅泡菜都會特別好味！

聽完講解之後就輪到我哋落手落腳整泡菜啦！

每個人面前都會有一份紅蘿蔔、白蘿蔔同葱，要將紅蘿蔔同白蘿蔔切成絲，而葱就要切成3-5cm咁長。遇到困難或者有問題嘅時候可以舉手叫老師過嚟幫手。

切完之後就可以開始整泡菜嘅靈魂醬料，醃出嚟嘅泡菜好唔好食就視乎呢個醬嘅比例調較得啱唔啱。

首先將韓國蝦醬、鯷魚露、糖、芝麻、辣椒粉、糯米糊同薑各一羹加落頭先切好嘅蔬菜上面，鍾意食辣嘅朋友們最多可以加3羹辣椒粉，可以根據自己口味調較辣度。

戴埋膠手套撈勻佢，醬料就完成啦！

接住落嚟就要將頭先整嘅醬搽落用海鹽醃過嘅大白菜上面，老師話每塊葉都要搽勻循，葉同葉之間都要放滿醬料，醃出嚟嘅效果先會最好。

搽完之後要將泡菜包好，將入面多餘嘅空氣整走，除咗會靚啲之餘仲可以保存得耐啲，發酵效果都會更加好。

咁就整完泡菜啦！全個過程比想像中簡單，相信大家都應該會覺得好玩！

老師會幫大家將整好嘅泡菜放落真空袋，等大家可以帶返屋企。整好嘅泡菜可以即刻食，最耐可以擺3個月，但係過2-3個禮拜之後就會開始有酸味，唔鍾意食太酸嘅泡菜嘅話就要早少少食啦。

整完泡菜之後，仲會有試食泡菜煎餅嘅時間！

老師會好似頭先咁，先簡單介紹吓材料同整法，然後就會親自示範俾大家睇。將泡菜、麵粉同水撈勻之後放落鑊煎，全個過程唔使10分鐘就完成啦！

老師整出嚟嘅泡菜煎餅完全唔辣，點埋豉油仲更加好食添！而呢個課程亦都會喺呢度結束，總共用咗大約1個鐘頭。

泡菜係韓國嘅傳統食物，蘊含韓國歷史。大家可以透過親自體驗整泡菜，加深對韓國飲食文化，乃至於韓國嘅認識。有興趣嘅朋友記住透過我哋輕鬆報名啦！

「首爾泡菜文化體驗館」前往方法

撳我預約👇🏻

[스팟] 首爾泡菜文化體驗館

如果你對文章內容有咩意見或者想查詢更多資訊，可以隨時喺留言區留言，或者透過電郵(help@creatrip.com)聯絡客戶服務中心。想知更多韓國最新資訊，記住follow埋我哋嘅Instagram同Threads啦！