Hello，大家好，我哋係由韓國人每日提供最新韓國旅行資訊嘅Creatrip。
去旅行除咗不斷去景點參觀同影相，有時候可以放慢腳步，參加各種特色DIY工作坊，製作出超有紀念價值嘅紀念品同手工藝！韓國有咩DIY體驗可以玩？今日就睇下小編介紹，有興趣嘅話可以save低下次嚟體驗！
韓國手工DIY工作坊體驗推薦
香薰浴鹽DIY體驗
喺香港都好紅嘅洗沐香氛品牌「ANILLO」喺佢哋嘅聖水旗艦店搞緊香薰浴鹽DIY製作工作坊，大家可以運用「ANILLO」獨有標誌性香氣同法國產Guerande海鹽、乾燥香草同精油等高級材料整出屬於你嘅浴鹽，重點係包裝夠靚送禮自用都好啱！
[스팟] ✨Creatrip獨家✨ ANILLO浴鹽製作工作坊
手工酒DIY體驗
最近韓國好興整各種水果、花、藥材酒，大家可以揀自己鍾意嘅口味，泡製出出色彩繽紛嘅酒，影相打卡夠靚之餘味道一流，鍾意飲酒嘅你一定唔可以錯過！
[스팟] MOOINN GONGBANG手工酒製作體驗（弘大）
韓國傳統米酒DIY體驗
除咗水果酒之外，大家仲可以去整韓國傳統米酒，由蒸米到發酵成個過程都可以體驗！對韓國酒文化有興趣嘅話仲可以去埋參觀韓國米酒廠（就好似細個去益力多工廠參觀咁XD
[스팟] Suguk韓國傳統米酒工作坊（建大）
[스팟] 春風釀造廠 | 韓國傳統米酒探索之旅
潔面乳DIY體驗
Whipped係韓國一個好出名嘅護膚產品brand，招牌潔面乳質地同忌廉一樣超得意！之前喺汝矣島The Hyundai Seoul搞Pop-up Store，吸引好多人排隊買！而家喺首爾聖水洞開咗旗艦店，大家仲可以參加手作DIY課程，自製潔面乳。
手工蠟燭製作DIY體驗
最近韓國多咗好多手工製作班，手工蠟燭唔單止可以做裝飾，仲可以實際用或者送俾人，非常實用！無論係可愛熊仔型蠟燭定勁逼真嘅蛋糕蠟燭都可以學整，成個過程勁療癒 ！
[스팟] YESAROY手工蠟燭工作坊（聖水）
泡菜製作DIY體驗
講起韓國當然唔少得泡菜，大家又有冇諗過親手學整呢？位於景福宮安國站嘅泡菜文化體驗館有專為外國人準備泡菜製作體驗課程，由經驗豐富嘅專家手把手教大家整泡菜，仲會幫你包好方便帶上機，更加可以現場試食泡菜煎餅，深入瞭解韓國飲食文化！
香水DIY體驗
坊間有唔少人氣香水款式，不過如果人人都買嚟用，就會即刻冇曬個人特色... 韓國有好多香水工坊，大家可以自己親手DIY香水，除咗可以學到更多有關香水嘅知識，仲可以整返支獨一無二嘅香水！
[블로그] 韓國手工DIY工作坊體驗推薦
飾物DIY體驗
如果係同另一半嚟韓國玩，一起整返對情侶戒指或者飾物，相信會成為一個非常難忘嘅回憶！韓國飾物DIY工作坊大部分都係整戒指，無論係99%銀戒指到木質戒指都有！另外，亦都有唔少工坊會提供手鍊、頸鍊DIY體驗，建議揀用料比較高級嘅工坊，可以保存比較耐之餘更加冇咁容易敏感！
[스팟] UniU Seongsu（聖水）
手工印章製作DIY體驗
唔知大家有冇韓文名呢？如果有嘅話，不妨可以去整返個有自己韓文名嘅印章！首爾仁寺洞有好多賣印章嘅鋪頭，推薦大家直接去印章體驗館，等專業導師教你怎麼刻返個專屬你嘅印章，整返件獨一無二嘅紀念品！
手工毛冷袋製作DIY體驗
用巨型冷線同雙手就可以織成一個袋？最近連韓國明星都迷上編織，呢個體驗更加唔需要其他工具，只要根據導師指示一步一步整，就可以將色彩繽紛嘅冷線變成一個袋，成為今次旅行最實用、最有紀念價值嘅紀念品！
Tufting DIY體驗
最近無論係韓國定香港，Tufting受到越嚟越多年輕人歡迎！其實Tufting就係用一枝槍狀嘅機器加上毛線整出一個個pattern，而通常都會用嚟整毛毛地氈。呢度提供80種顏色嘅毛線，大家可以自由整一件作品帶返屋企。有興趣嘅朋友可以透過我哋報名！
手作毛毛鐵線公仔DIY體驗
旅行每分每秒都好珍貴，如果想簡簡單單參加手工DIY工作坊，推薦大家去整毛毛鐵線公仔！呢個體驗只需要30分鐘，整完無論送禮定自用都好啱！
韓國民俗畫體驗
如果大家對美術有興趣，不妨可以去畫韓國傳統民畫，唔單止可以深入瞭解韓國文化，更加可以激發創意、放鬆身心，親手畫完仲可以帶返屋企做紀念品！
韓國傳統吊飾&布袋DIY體驗
大家喺韓國路邊攤販應該成日都會見到呢種精緻韓式傳統吊飾，不過自己整相信會更加有紀念價值！小編今日要推薦嘅呢間韓服鋪每逢weekend都有搞工作坊，教大家整傳統韓服吊飾同布袋，勁特別！
[스팟] Danha韓服韓國傳統飾物工作坊（北村）
[스팟] Leesle韓服韓國傳統飾物工作坊（弘大）
如果你對文章內容有咩意見或者想查詢更多資訊，可以隨時喺留言區留言，或者透過電郵(help@creatrip.com)聯絡客戶服務中心。想知更多韓國最新資訊，記住follow埋我哋嘅Instagram同Threads啦！
