Hello，大家好，我哋係由韓國人每日提供最新韓國旅行資訊嘅Creatrip。
喺首爾行程只係去到一半，行李箱已經塞到滿曬，但仲未買手信點算好？其實唔洗特登走到咁遠！今日就等小編帶阿加去幾乎個個嚟韓國玩嘅朋友們都會去嘅「樂天超市」首爾站分店，一次過買齊韓國零食到日常用品啦！
首爾站「樂天超市」介紹
首爾站「樂天超市」資訊
- 地址：서울 중구 한강대로 405
- 營業時間：10:00 - 24:00
每月休息日👇🏻
[블로그] 8月韓國超市/百貨公司休息日
首爾站「樂天超市」可以話係首爾交通最方便嘅超級市場！因為佢同首爾站直通，所以無論你係住明洞定臨去機場之前想去掃貨，首爾站「樂天超市」可以話係你嘅最佳選擇！
首爾站有AREX機場快線，唔需要1個鐘就可以直達仁川機場，搭一般列車去金浦機場都只係需要大約40分鐘，全程唔洗轉車。你可以喺上機前輕鬆購物，做最後衝刺買各種傳統小食同手信，重點係可以做退稅！
首爾站「樂天超市」距離明洞同南山公園等人氣景點亦都好近，大概行10至15分鐘就會到，可以話係一個方便嘅樞紐，可以一次過買齊旅行必需品之餘仲可以買埋各種韓國手信返香港送俾親朋戚友。
首爾站「樂天超市」附近必去景點
首爾站「樂天超市」最大嘅優點之一就係地理位置超方便，附近就有幾個首爾最有代表性嘅景點，行路或者搭一個地鐵站就到！
- 首爾路7017 — 離超市只係幾步路，呢個空中花園由舊高架橋改建而成，可以喺唔同角度欣賞首爾城市景色，天氣好去散步勁chill！
- 明洞 — 首爾購物天堂，只需搭一個地鐵站就到！無論你鍾意時裝、護膚品定街頭小食，都好啱你去！
你可能會有興趣👇🏻
[블로그] 明洞美食總整理
[블로그] 明洞體驗活動總整理
- N首爾塔(南山塔) – 搭短途巴士或者纜車就可以去到呢個可以俯瞰首爾城市景色！
用優惠價買定入場券啦👇🏻
[스팟] N Seoul Tower Observatory Admission Ticket ✨
- 德壽宮 — 喺呢個皇宮同石牆路散步，可以感受韓國歷史同寧靜氛圍！
- 南大門市場 — 韓國最大嘅傳統市場，想搵平價手信、街頭小食或者傳統商品可以去睇睇！
- 南山公園 — 如果想親近大自然，可以去呢度行山、呼吸新鮮空氣，喺市中心欣賞靚景！
無論你鍾意歷史、美食、購物定城市景色，首爾站附近都有好多嘢玩同睇，下次不妨去首爾站「樂天超市」嘅時候順便去埋！
首爾站「樂天超市」現場環境
[이미지 슬라이더] 
首爾站「樂天超市」入口唔難搵，如果你喺首爾站入面，可以由2號出口出去，跟住上圖箭嘴行就得。如果你係喺首爾站正門廣場面向車站，只要行上樓梯或者搭扶手電梯，然後向右轉，經過Five Guys，就會見到首爾站「樂天超市」嘅正門。
[이미지 슬라이더] 
如果你有大件行李，一入到去職員就會指示你去專用行李寄存區，你可以免費寄存行李最多2個鐘頭，安心去shopping！細件行李仲有locker可以用，令你購物更加方便。
唔識韓文都唔緊要，首爾站「樂天超市」店內有英文指示牌，就算係第一次嚟都可以輕鬆搵路！
首爾站「樂天超市」必買手信推薦
喺新國家逛超市又新奇又有啲唔知點揀，見到咁多唔識嘅產品，真係唔知買邊樣好。所以我哋幫你整理咗一份本地人最愛嘅零食同好物清單，全部都係韓國人日常必備，送禮或者自己食都一流，買咗絕對唔會後悔！
小編自己去一個國家旅行都好鍾意去超市行，不過有時候雖然好新奇，但係會有啲唔知點揀，因為根本唔知邊啲產品必買，邊啲產品唔伏XD 今次小編就幫大家整理咗一份韓國人最愛嘅零食同好物清單，全部都係當地人日常必備，送禮自用都一流，買咗絕對唔會後悔！
零食
呢款Leaf Pie最近喺韓國超受歡迎，酥脆千層酥牛油味香濃，外面有一層牛奶朱古力，香脆同甜味完美融合，雖然好邪惡但係好好食！
大家仲會喺首爾站「樂天超市」搵到唔少特別版零食，好似呢款以韓國傳統畫作為靈感嘅Pepero禮盒包裝勁靚，送禮或者做手信都好啱！
[이미지 슬라이더] 
你仲可以搵到人氣韓國零食嘅限定口味，熟悉之餘又有韓國特色，試下新口味一定有驚喜！
HBAF杏仁一向好受歡迎，帶返屋企同朋友家人一齊食就啱晒啦。除咗最出名嘅蜂蜜牛油，仲有芥辣、Tiramisu、辣炒年糕等多款有趣口味，梗有一款啱你口味！
如果你想試啲傳統嘢，可以買韓國傳統零食。韓國傳統零食有好多唔同種類，好似米通咁每款口感同味道都唔同，但全部都精緻又好食。
食物
講起韓國手信，點可以唔提最經典嘅三養辣雞麵？喺首爾站「樂天超市」你可以搵到好多只喺韓國先有嘅限定口味，而且價錢比香港平差唔多一半！
大家知唔知辣雞麵醬原來仲有樽裝版？大家帶返屋企會更加方便，而且可以加喺任何食物上，隨時隨地享受火辣口味！
韓國水果雖然貴，不過高級水果品質真係冇得彈。其中推薦一定要試Shine Muscat香印提子，清甜爽脆，可以買返住宿慢慢食！
大家知唔知原來喺首爾站「樂天超市」仲可以買到辣醬蟹，價錢仲意外地平！呢款係必試嘅韓國美食，想挑戰嘅唔洗專登走去傳統市場，喺樂天超市買返酒店就可以慢慢嘆啦！
高級禮品
去首爾站「樂天超市」記得去埋特別嘅酒類專區「Bottle Bunker」，呢度有高級紅酒、頂級烈酒、各種調酒材料，無論你想自己調酒定買返屋企做高級手信都有齊！
喺「Bottle Bunker」仲可以搵到高級韓國威士忌Ki One，買返去擺酒櫃或者送俾重要嘅人都夠晒有心思！
仲有好多得韓國先有嘅特色手信可以揀，記得預多啲時間慢慢行！
健康&美容
首爾站「樂天超市」仲有健康美容專區，可以一次過買齊各種韓國護膚品同日常護理用品。
你仲可以搵到人氣又平價嘅韓國面膜，儲定一堆喺屋企慢慢用，仲唔洗擔心會荷包大出血！
韓國當地人小貼士：一定要試下韓國嘅膠原蛋白啫喱！韓國人無論係男係女，每日都會食一條，令皮膚保持光澤同健康。
首爾站「樂天超市」設施
行李保管服務
- 免費保管2小時
自助退稅機
- 即時退稅唔止可以喺專用退稅機辦理，仲可以喺自助收銀同收銀櫃台做到。
- 只要消費滿₩15,000（唔包括新鮮食品等免稅商品），就可以申請退稅。
自助換錢機
EMS郵寄服務
- 營業時間：星期一、二、四至日 10:30 - 18:30
包裝台
首爾站「樂天超市」優惠活動
- 消費超過₩100,000，並進行最少₩15,000退稅，即可免費獲得摺疊購物袋一個！
- 即日起至2025年12月31日，透過KakaoTalk登記做新朋友，仲會送濕紙巾一包！
大家可以參考埋我哋之前去首爾站「樂天超市」拍片嘅精華片段：
如果你對文章內容有咩意見或者想查詢更多資訊，可以隨時喺留言區留言，或者透過電郵(help@creatrip.com)聯絡客戶服務中心。想知更多韓國最新資訊，記住follow埋我哋嘅Instagram同Threads啦！
