Hello，大家好，我哋係由韓國人每日提供最新韓國旅行資訊嘅Creatrip。
有去過韓國玩嘅朋友們應該都有印象，每次喺飛機空姐都派一大堆紙仔俾大家填，有時候都唔知要點填好... 韓國入境處早前宣佈將會簡化入境手續，啟用電子入境申報系統！同以前有咩唔同？幾時可以申報？有邊個需要申報？等小編一次過話你知啦！
韓國電子入境申報
韓國電子入境申報(e-Arrival Card)簡介
以旅遊目的入境韓國嘅時候，如果本身冇外國人登錄證，或者冇好似以前咁申請K-ETA（而家K-ETA係optional，唔一定要申請），就需要填上面呢張入境卡，寫低個人資料、今次入境韓國目的、住址與聯絡方式。
而韓國法務部日前宣布，由2025年2月24號起實行電子入境申報制度（e-Arrival Card），而原本嘅紙版入境卡亦都會同電子版同時併用至年尾。
一般旅客可以喺入境前3日（72小時）透過電子入境申報網站填寫資料，成個手續係免費嘅，而且過程簡單，只要upload護照個人資料頁面同其他相關資訊就得，有效加速入境流程。而未滿14歲人士就需要由成年監護人幫手申報！
경향신문
到埗韓國過關嘅時候，如果大家事先已經喺網上做好申報，工作人員一掃描你本護照就可以自動判讀，唔需要另外列印申請確認畫面，過關會快好多！
韓國電子入境申報(e-Arrival Card)申請教學
STEP 1. 確認自己需唔需要申請
持有短期訪韓簽證 | 不需申請 |
持有長期駐韓簽證 | 不需申請 |
免簽證入境 | 需要申請 |
K-ETA仍在效期內 | 不需申請 |
已申請SeS自動通關 | 不需申請 |
持有香港護照嘅話，以「旅遊」目的入境韓國嘅時候因為係「免簽證」，所以需要事先喺網上進行電子入境申報，或者到時候攞紙版入境卡寫。
STEP 2. 去電子入境申報官網
- www.e-arrivalcard.go.kr
- 提供多種語言（簡體中文、英文、日文等）
開放電子入境申報時間係入境前3日（包括當日），例如你班機係喺2月28號飛，你可以喺2月26、27、28號申請！如果你唔記得事前申請都唔緊要，去到2025年年尾都仲可以填實體入境卡。
電腦同手機都可以用，不過小編實測發現電腦版網站速度會比較快！
STEP 3. 同意條款、填寫電郵地址
STEP 4. 上傳護照照片、確認本人資訊
如果係用手機版，大家可以直接用相機影護照，而用電腦版就只可以上傳JPG檔案。上傳護照個人資料頁面相片之後，系統會自動幫你填個人資料，大家記住要check多次同填埋其他空格（upload唔到都可以直接輸入資料）。大家可以喺呢個階段幫埋同行家人朋友申請埋！
STEP 5. 輸入入境、出境資訊
大部分朋友應該都係搭飛機嚟，所以記住要揀AIR（如果係搭船就揀SEA），其餘航班資料買機票嘅時候都會有，大家只要跟住填就得！不過要注意，網上申報嘅時候需要一併填寫出境資訊，所以記住要買埋回程機票啦！
跟住就要輸入住宿地址（就算中途需要換住宿都只需要填其中一個地址就得），記住只可以打韓文或者英文，大家可以輸入郵遞區號（5位數字），或者填包括街道名嘅地址，然後再揀正確地址。
STEP 6. 線上申報入境完畢
完成之後會出現呢個畫面，因為唔係一定要印出嚟，小編建議大家可以download PDF檔案自己留底就得。
另外，網上申請之後有效期只會去到申請完72小時內，例如你2月25號15:00申請，有效期就只會去到28號14:59，記住要喺到期前入境，如果唔係就要重新申請。
韓國電子入境申報修改
如果資料有錯需要改，可以去官網撳「查詢・修改」，輸入申請編號、護照號碼、出生年月日之後就可以進行修改。
韓國電子入境申報(e-Arrival Card)常見問答
Q1. 以後都唔洗寫入境卡？
A：即日起至2025年12月31日，網上入境申報系統同以前寫開嘅紙版入境卡會同時並用，大家只需要二揀一填就得！
Q2. 申請網上申報洗唔洗俾錢？
A：唔需要！
Q3. 一定要喺網上申報？
A：唔一定，大家仍然可以喺飛機填入境卡！
Q4. 未成年兒童可唔可以申請？
A：未滿14歲需要由監護人進行代理申報，而14歲或以上人士就可以自己申報。
Q5. 我有K-ETA嘅話仲需唔需要申報？
A：如果你以前申請落嘅K-ETA仲係有效期，咁就唔需要申報；但如果已經過期，咁就需要揀填入境卡或者事先網上申報。BTW 2025年12月31號前港澳台遊客以旅遊目的入境韓國都唔需要申請K-ETA！
Q6. 我有SeS自動通關，也要申請嗎？
A：唔需要！到埗之後直接去自動通關機器掃描護照就可以入境！
相關資訊/教學👇🏻
[블로그] 韓國「SeS自動通關」申請教學
Q7. 一定要有回程機票先可以事先申報嗎？
A：暫時系統規定一定要填埋回程資訊，如果冇提供嘅話無辦法完成申報，建議買埋回程機票，或者唔好網上申報，直接到時候填紙版入境卡。
Q8. 飛之前唔記得事先申請，會唔會入唔到境？
A：如果唔記得事先申請，記住一定要喺飛機問空姐攞紙版入境卡填，填好之後過關嘅時候交俾職員就得！
Q9. 出境嘅時候需唔需要整？
A：唔需要。
Q10. 點解冇我班機嘅日期？
A：因為開放電子入境申報時間係入境前3日，官網首頁會話你知道今日可以申請邊幾日！而且申請完之後有效期都係得72小時，可以到時候先再申請！
Q11. 手機版網頁上傳唔到護照相？
A：如果手機版一直都upload唔到，咁就建議你轉用電腦版進行申請，或者直接手動填資料。喺呢方面有任何疑問，可以去查詢e-Arrival Card相關機構。
Q12. 所有機場入境都要整？
A：係，所有可以入境韓國嘅國際機場同港口都適用！
韓國逐步推行電子入境申報，未來可能會完全取代紙版入境卡，建議大家提前瞭解同善用新系統，確保可以順利入境！
入境韓國前必讀攻略💡
[블로그] 2025韓國入境最新規定/必備資料與流程
[블로그] 2025仁川機場巴士時刻表/路線/費用整理
[블로그] 2025韓國換錢教學/看韓元匯率攻略
如果有更多想知嘅內容，都可以隨時留言或者dm話俾我哋知：）
Mail：help@creatrip.com
