Hello，大家好，我哋係由韓國人每日提供最新韓國旅行資訊嘅Creatrip。
首爾喺2024年迎嚟各種新轉變，亦都訂立咗唔少全新政策，以增強生活機能同方便性！而最近首爾市推出咗一張叫做「氣候同行卡（기후동행카드）」嘅公共交通工具專用卡，到底係咩嚟？
首爾氣候同行卡
「氣候同行卡/Climate Card」係咩嚟？
氣候同行卡
「氣候同行卡（기후동행카드）」又叫做 Climate Card，係首爾市喺2024年1月底開始發售嘅公共交通工具定期使用券，結合韓國大眾交通折扣商品同優惠。
「氣候同行卡」有2款，最basic嗰款30日內可以無限搭首爾市內地鐵同巴士，另外有可以搭埋公共單車嘅選項，不過就要貴少少，但平均每個人每個月可以慳成₩30,000，都真係幾抵！價錢如下：
| 無限搭首爾市地鐵、巴士 | 一般原價 ₩62,000 (62000) |
| 青年優惠 ₩55,000 (55000) | |
| 無限搭首爾市地鐵、巴士 + 公共單車 | 一般原價 ₩65,000 (65000) |
| 青年優惠 ₩58,000 (58000) |
改版後遊客都可以用「氣候同行卡」？
뉴스1
而經過半年嘅試行期間之後，氣候同行卡將會進行改版，由7月1號開始販售。而好消息係...連外國遊客都可以買嚟用啦！
短期乘車券選項及價錢 | |
1日券 | ₩5,000 (5000) |
2日券 | ₩8,000 (8000) |
3日券 | ₩10,000 (10000) |
5日券 | ₩15,000 (15000) |
7日券 | ₩20,000 (20000) |
今次改版除咗保留原先30日券，更加會推出青少年優惠版，仲會增設短期氣候同行卡，提供1、2、3、5、7日無限乘車券俾只會短期留喺首爾嘅人用，對外國遊客嚟講可以話係福音（不過短期版費用唔包公共單車）。
首爾地鐵定期乘車券
咁呢張「氣候同行卡」同首爾地鐵之前推出嘅定期乘車券又有咩分別？定期乘車券限定每個月只可以搭60程車，亦都會指定路線/地段，如果超出咗呢個area就會扣多1程車。小編個人覺得「氣候同行卡」會比較自由，而且仲可以搭埋巴士，方便好多！
另外只要持有「氣候同行卡」，仲可以享有各種折扣優惠，例如首爾大公園、首爾植物園、首爾科學館等等嘅文化設施同景點入場券都有折扣，連The Painters表演都可以用優惠價睇，比起咩優惠冇都普通地鐵定期乘車券抵好多！
「氣候同行卡」可以喺邊度買/用？
「氣候同行卡」實體卡可以喺首爾地鐵1號線首爾站至清涼里站、2號線至8號線嘅客戶服務中心，9號線、牛耳新設線同新林線地鐵站嘅部份便利店買到，而外國遊客喺首爾觀光Plaza同明洞旅遊資訊中心都可以買到！實際使用方法可以參考T-money官網（中文版、英文版）。
現時「氣候同行卡」適用範圍包括：
首爾地鐵
| 1號線 | 道峯山至溫水/衿川區廳 |
| 2號線 | 全線 |
| 3號線 | 全線 |
| 4號線 | 政府果川廳舍至榛接 |
| 5號線 | 傍花至江一/馬川 |
| 6號線 | 全線 |
| 7號線 | 長岩至溫水 |
| 8號線 | 全線 |
| 9號線 | 全線 |
| 京義中央線 | 炭峴至九里/首爾 |
| 京春線 | 清涼里/新內 |
| 京江線 | 板橋至二梅 |
| 西海線 | 一山至金浦機場 |
| 水仁盆唐線 | 清涼里至梧里 |
| 新林線 | 全線 |
| 牛耳新設線 | 全線 |
| 金浦黃金線 | 全線 |
| 機場鐵路 *非直達AREX | 可在仁川機場1航/2航下車 *無法上車 |
| 金浦機場至首爾站 |
首爾巴士
| 藍色巴士 | 可搭乘 |
| 綠色巴士 | 可搭乘 |
| 廣域巴士 | 不可搭乘 |
| 觀光巴士 | 不可搭乘 |
| 02號巴士 | 可搭乘 |
| 04號巴士 | 可搭乘 |
| 05號巴士 | 可搭乘 |
| 08號巴士 | 可搭乘 |
| 09號巴士 | 可搭乘 |
| 10號巴士 | 可搭乘 |
| 社區綠色小巴 | 可搭乘 |
| 仁川巴士 | 不可搭乘 |
| 京畿巴士 | 不可搭乘 |
公共自行車
| 短天數氣候同行卡 | 不可騎乘 |
| 30日天數氣候同行卡 | 可騎乘2小時 *需看購買方案為何 |
之後適用範圍更加有望可以擴展到無人駕駛巴士同將會喺2025年內計劃推出嘅漢江水上巴士，政府亦都計劃喺11月推出有扣賬卡/信用卡付款功能嘅「氣候同行卡」，之後想增值就唔需要咁麻煩啦！
如果你對文章內容有咩意見或者想查詢更多資訊，可以隨時喺留言區留言，或者透過電郵(help@creatrip.com)聯絡客戶服務中心。想知更多韓國最新資訊，記住follow埋我哋嘅Instagram同Threads啦！
