Hello，大家好，我哋係由韓國人每日提供最新韓國旅行資訊嘅Creatrip。
講到釜山，大家最先可能會諗到嘅係海景，不過今日小編想同大家介紹另一個竹林景點—九頭山竹林，如果鍾意享受大自然嘅你，之後就可以嚟打卡啦！
釜山九頭山竹林介紹
아홉산숲
地址：부산광역시 기장군 철마면 미동길 37-1
營業時間：09:00 - 18:00 （最後入場時間：17:00）、逢星期一休息
入場費：成人、小童₩5,000、4歲以下免費
小Tips：由釜山巴士總站（釜山地鐵1號線老圃站）2號出口搭機張2-3號巴士，搭45分鐘左右，喺䉠洞村（미동마을）落車，行大約5分鐘就會到。或者可以揀搭的士，坐20分鐘左右，費用大約係 ₩10,000。
因為呢度有9座山峰，所以稱為「九頭山竹林」，呢一帶係由南平文氏家族管理，經歷咗9代，有400年歷史，喺日本殖民時期都冇將呢帶對外開放，自然風光先會一直保存得咁好。
原本呢個地方只係for幼稚園進行體驗活動，冇對外開放，不過因為唔少電影同電視劇都嚟取景，慢慢變得出名，自此喺2016年就正式向外開放。
九頭山竹林面積52萬平方米，有好多條路線可以揀嚟行，大家可以參考地圖再行，根據每個人體力差異，如果要行晒成個森林大約要一個鐘至個半鐘。
行到中途大家會見到呢啲路牌，大家可以跟住行，唔怕會蕩失路。
不過就算呢度面積大，為咗保留呢度嘅美景唔受破壞，會限制人流同時間入場，入到去大家可以好安靜咁欣賞美景。
由入口開始行20分鐘，會行到第9個景點，呢度有好多長超過20cm嘅孟宗竹（맹종죽），為咗可以令到呢個地方可以一直平和同保存落嚟，有時會請舉行啲宗教活動。
大家可以睇到呢度都有唔少韓劇嚟過取景。
韓劇《月之戀人－步步驚心：麗》
電影《群盜》
2016年韓劇《月之戀人－步步驚心：麗》，同2014年上映嘅電影《群盜》都喺度取過景。
韓劇《The King：永遠的君主》
而喺2020年《The King：永遠的君主》都有嚟過！當時大家睇到呢個場面，有冇好好奇喺邊度呢？
就算拍完劇，呢度仲有啲道具可以喺度打卡。
喺返返去賣飛嘅地方之前，呢度有一間韓屋叫做「觀薇軒」（관미헌），「觀薇軒」意思係即使係微不足道嘅草都要珍惜，其中蘊含南平文氏家族對關愛自然嘅理念。
即使已經起咗60年，但仍然有南平文氏喺度生活緊。
以前「觀薇軒」呢個地方係有養牛，佢哋喺地底有一個保存牛奶嘅地方，當時年代明明電力未咁發達，但佢哋有一個可以保存牛奶嘅雪櫃真係好神奇！
喺出口附近，亦都有用竹制嘅紀念品可以買，價錢一啲都唔貴。
九頭山竹林可以一直得保存咁得好，係因為有南平文氏家族管理得好，大家先可以見到咁靚嘅大自然美景，之後去釜山，大家又會唔會想去打卡呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
