logo
logo
logo
logo
logo
logo
logo
logo
logo

成為偶像嘅過程

成為偶像有幾多個過程?舞台上閃閃發光,背後辛酸事邊個知?

Jihyun Lee
4 years ago
成為偶像嘅過程

Hello,大家好,我哋係由韓國人每日提供最新韓國旅行資訊嘅Creatrip


唔知大家平時睇Kpop,見到偶像喺舞台發光發熱嘅時候,自己有冇都好想成為其中一位呢?不過要成為偶像嘅過程一啲都唔簡單,背後好多辛苦嘅經歷未必大家都會知,今日小編就同大家講解點成為一位偶像啦!



成為偶像嘅過程

偶像志願生幾個男孩子站在韓國真人秀節目《PRODUCE 101》的背景下,共同努力準備成為K-pop偶像。

Mnet


目前估計,喺韓國大約有1百萬人都想做偶像,2018年每日經濟頭條,喺小學生同中學生進行問卷調查,曾經想成為偶像嘅比例佔大約70%左右。喺舞台上每一位偶像都發光發熱,深受唔少fans喜愛,係一個令唔少人羨慕嘅職業。


培訓過程中,年輕的女舞者們在明亮的白色舞蹈室中練習。

ET news


要成為偶像嘅第一步,首先要同經紀公司簽合約成為練習生。如果直接唔做練習生直接出道,呢個機會可以話近乎係0,咁如果想做練習生有咩途徑呢?



成為練習生嘅途徑

1. 街邊星探

一位身穿黑色T恤的年輕練習生,背景是天藍色背景板,上面用日語寫著「スタ一になりまス」字樣。


每一間經紀公司都會有星探,佢哋主要喺街上搵新人,多數會搵嘅一係外表比較出眾,一係就係同自己公司計劃緊嘅新團形象符合。就算俾星探發掘都未必一定話可以即刻出道做明星,首先要去試鏡,如果OK就會簽合約。


2. 去參加競選

2020年全球徵選海報上有一行穿著正式的年輕俊男在排隊報名,旨在追逐成為韓國流行音樂偶像的夢想。


唔少經紀公司都會定期安排國內或海外競選,甚至有時透過特定節目嘅試鏡。除咗有定期公開試鏡嘅之外,有啲甚至會一直長期開放試鏡嘅競選。不過有啲公司除咗會有練習生試鏡之外,甚至直接會有偶像出到試鏡比賽,就好似今年10月HYBE為咗出女團,之前就喺全球進行試鏡。


HYBE - 網上試鏡

韓國著名娛樂公司的logo - HYBE,包括聲明『WE BELIEVE IN MUSIC』的標語。


目前,HYBE進行緊長期試鏡,只要係2003年之後出生,想成為歌手、演員或Model嘅人都可以申請。 透過HYBE試鏡網站上提交申請表同展示自己才能嘅片就得,如果合格大約會喺2星期內收到個別通知。


YG - 網上試鏡

YG娛樂的正式試鏡海報,帶有麥克風的黑色背景,表達了一種音樂專業氛圍。


YG 直到2030年12月31號,有長期Vocal、Rap、舞蹈,3種唔同領域進行試鏡,任何性別、國籍都可以參加,同時冇受到年齡限制。 但喺呢段期間最多只可以申請一次(如果唔成功,下一次就可能要等到2031年)。 網上可以直接申請,喺2-4個星期會收到個別通知,之後再進行第二次現場面試。


SM - 網上試鏡

SM娛樂的簡約現代logo,粉色背景上勾勒出大寫字母'SM'。


SM可以隨時Send Email或者喺網上報名參加,可以send唱歌、跳舞或演技嘅片、唱歌或Rap嘅錄音檔,或者影自己正面或全身照亦都得!


星期六公開試鏡

一羣年輕人站在舞台上,以早期參加試鏡的舞台為背景,服裝風格各異。



星期六公開試鏡係SM歷史悠久嘅試鏡之一,大約都有20年, 每逢星期六喺SM Office或者SM COEX Artium舉行,所以如果想成為偶像,每個星期六都有好多人喺SM面前排隊。

雖然聽落好似每個星期都有機會咁,但聽講目前只有7位偶像係透過星期六公開試鏡而入到去SM成為練習生,當中包括Super Junior希澈、少女時代潤娥、SHINee泰民、Red Velvet瑟琪、NCT楷燦、延佑同aespa Giselle。聽講最近因為疫情影響,改用ZOOM舉行試鏡。


JYP - 網上試鏡

JYP娛樂的藍色logo背景上寫著'LEADER IN ENTERTAINMENT'強調公司的引領地位。

JYP目前可以透過官方網站申請,有分Vocal、舞蹈、Rap、演技、Model等進行試鏡。冇分任何年齡、性別或國籍限制,隨時都可以參加。


JYP公司試鏡

一大羣想成為偶像的年輕人在舞台區域整齊坐著,正在等待他們的試鏡機會。

JYP AUDITION 페이스북


JYP每個月嘅第一個同第三個星期日都會喺JYP Office舉行現場試鏡。 去到現場,可以喺Vocal、Rap、跳舞、演技、Model其中揀一個進行試鏡。不過有一個要求係韓國年齡需喺12-25歲之間,其他性別、學歷、國籍冇任何限制。 目前因為疫情影響而暫停,不過當開返嘅時候,大家會唔會諗住去挑戰呢?


3. 通過學院聯繫

一羣舞者在明亮的舞室中練習,她們穿著瑜伽褲和休閒裝進行同步練習。

스테이지 631


韓國有好多學院係專為想成為偶像而設,喺嗰度主要係培訓舞蹈同埋唱歌,有啲學院更加係經紀公司直接所屬,每間學院同課程價格都會有唔同,不過聽講通常一個月學費係40至60萬韓幣(約HKD2,800 - 4,200),聽講有啲學生真係可以透過學院而成功出道添!


如果學院係同經紀公司有聯絡,學院多數都會推薦有實力嘅學生,或者有啲學院會喺網站upload學生嘅評價片,經紀公司發現唔錯嘅話都會直接聯絡學院。另外如果係大型嘅學院,有經紀公司會直接去現場訪問同試鏡。換句話講,因為係經紀公司直接去學院搵學生,競爭率會相對較低,想成為偶像要發揮得相當好,同時係一個好好嘅機會。



偶像練習生訓練

一羣年輕女性正在練習舞蹈,她們對著鏡子進行表演排練,手持麥克風練習歌聲。헤럴드 경제


經過星探發現、現場試鏡、參加學院,經過一番競爭終於可以成為練習生,不過而家先係真正嘅開始,成為練習生少短則幾個月,長嘅話可能需要幾年。喺呢段時間大家都要準備好舞蹈實力、歌唱實力、演技、廣播、學外語等,立志要成為一位完美嘅偶像。喺過程中絕對唔會需要練習生俾任何費用,不過出咗道之後就會慢慢計。


一位正在接受專業面試的練習生,攝影機和燈光設備顯示出試鏡場地的專業性。

PD 수첩


不過要提提大家,如果有經紀公司要求練習生俾錢嘅話,千祈唔好信,好多都係呃人,就連IU之前都俾好幾間呃過,仲賠咗唔少錢。直到最近都有啲未正式註冊嘅假冒經紀公司,唔少想成為偶像嘅練習生都俾佢哋呃咗,如果遇到呢啲情況,一定要快啲走!


前偶像練習生採訪畫面,背景中有關於經理要求的英文字母,增強了故事畫面的氛圍。

PD 수첩


另外,仲有好多假嘅經紀公司會呃啲想成為女團嘅練習生,佢哋扮哂有贊助商贊助,氹佢哋簽咗合約之後就可以出道,但實際係叫佢哋賣淫。就算幾想出道都好,只要遇到呢啲情況一定要走!


聽講過去如果練習生違反合約,就要向經紀公司賠1億至1.5億韓幣。 不過截至2017年,公平交易委員會已經通過審查,糾正不公平合約。


《PRODUCE 101》女團選秀節目的舞台上,數位練習生正背對著觀眾,在燈光下閃耀。

Mnet


如果入到一間好嘅經紀公司,佢哋會好積極培訓練習生,為咗評估佢哋有幾了解培訓內容,每逢月尾都會有評價。 而呢啲評價都係通過積累去決定練習生可唔可以成功出道。 大家如果都有睇《Produce系列》、 《偶像學校》、《Girls Planet 999》等偶像選秀節目,就可以了解練習生進度。

多位舞者在舞蹈室中進行練習,最前面的舞者抬起左腿,顯示出舞蹈訓練的艱辛。

중앙일보


不過要成為偶像唔係話努力就得,有啲練習生可能就算練習咗近十年,如果同公司想要推出嘅新團形象唔符合,都有可能唔可以成功出道。因為好多偶像都會喺10幾歲尾至20頭出道,如果過咗25歲後,仲未可以成功出道,咁就會放棄或者會知道係冇望。

不具名韓國偶像在訪談節目中的熒幕顯示,畫面字幕用韓語揭示出成為偶像的挑戰。

PD 수첩


聽講好多人因為想成為偶像,大半時間都投資落呢份「工」到,由細就開始去練習室,唔返學,所以之後搵工都相對比較難。前MBLAQ成員天動就有講過,佢練習生喺17歲開始,19歲出道。就算係成人,佢喺接受採訪嘅時候都講過唔知點上網買嘢或轉帳。好多以為正常人都會知嘅,身為練習生可能會錯過好多,所以想成為偶像必須要承擔呢個高風險。



出道

SM娛樂公司旗下的年輕男子組合穿著雙色服裝,在錄影棚內合影。SM 루키즈


要成為偶像除咗需要實力之外,同樣都好需要運氣,一來要符合經紀公司推出新團形象,另外要睇同成員夾唔夾等等。


一大羣偶像和粉絲在大型演唱會上共同站在舞台上,共同慶祝演出成功。

부산일보


根據專門批評韓國偶像音樂嘅網絡雜誌《偶像學》(아이돌로지),舉咗個例子:2015年新出道團體有60隊,總共324位。 然而當中仲有活動緊嘅偶像屈指可數。 如果將同經紀公司簽訂專屬合約、成為出道組、成功出道所有概率加起嚟概率唔到0.01%,所以好多人都話成為偶像比中樂透(即香港六合彩)概率要低。


《PRODUCE 101》男團選拔節目的一幕,練習生站台表演,背景屏幕上顯示著舞台燈光。


要成為偶像真係一啲都唔簡單,除咗要有實力之外,運都好緊要,不過如果想試都可以挑戰一吓!但要提提大家,就算唔成功出道,都唔代表冇實力,唔好覺得係輸咗,可以喺其他方面發展,一樣都可以好成功!




如果有更多想知嘅內容,都可以隨時留言或者dm話俾我哋知:)

Instagram:creatrip.hk

Facebook:Creatrip 帶你認識韓國每一面

韓國代購