Hello，大家好，我哋係由韓國人每日提供最新韓國旅行資訊嘅Creatrip。
唔知大家由幾時追韓星呢？對Kpop又有幾多認識呢？
K-POP成為韓國嘅主流文化已經超過咗20年！有K-POP 忠實fans將呢段K-POP偶像歷史按世代嚟分析，用唔同年齡段嚟區分可以更加理解K-POP嘅趨勢。今日就等小編列出1-4代嘅K-POP偶像，俾大家一眼睇清每個世代嘅特徵啦！😉
正式開始之前，對於K-POP偶像分嘅時代，每個人都有唔同嘅意見。 今日小編介紹嘅係大部分人同意嘅區分方法，以佢哋活動最活躍、人氣最高嘅時期為準，請大家留意啊！
第一至四代韓星與fans文化變遷
第一代偶像
時期：1996年 ~ 2004年
代表偶像
男團：H.O.T.、水晶男孩、god、神話等
女團：S.E.S、Fin.K.L、Baby V.O.X等
第一代偶像係代表韓國大衆音樂嘅3人組合--「徐太志和孩子們」解散同隱退之後開始嘅。 1996年，SM娛樂公司喺「徐太志和孩子們」、美國嘅男子樂隊、日本偶像中獲得靈感，誕生首個K-POP偶像H.O.T.。 以H.O.T.為開始，水晶男孩、god、神話、S.E.S、Baby V.O.X、Fin.K.L等組合相繼誕生。 同時鍾意同支持偶像組合嘅大規模K-POP fans group都喺呢個時候誕生。
當時網絡唔係咁通行，所以同而家嘅fans文化好唔同。 如果偶像上電視，就會用錄影帶錄起，而且為咗買演唱會飛，會喺開售前一日開始喺獨家賣飛嘅特定銀行排隊。
而且嗰時冇網上聽歌，所以會買碟嚟聽。 每當出新碟嘅時候，就會喺唱片舖前排隊買。 當時唱片市場非常活躍，被稱為傳奇組合嘅H.O.T，幾乎每次出碟都會達成百萬銷量。
而家每隊偶像組合都有象徵顏色，呢個象徵色文化都係由第一代偶像開始嘅。 H.O.T.係白色，水晶男孩係黃色，god喺天藍色等等，不過就冇好似而家咁有代表顏色嘅熒光棒。
但係會用雨褸同氣球代替！ fans會著住自己鍾意嘅偶像嘅象徵色雨褸，揮住氣球同佢哋加油助威。 另外，喺演出中冇歌詞嘅前奏部分叫成員嘅名，或者嗌口號等應援方法都係由嗰陣開始！
不過，K-pop偶像fans group出現嘅最早初期有好多問題，發生好多而家絕對唔會允許嘅事情，喺嗰陣會覺得理所當然， 例如去偶像嘅屋企或宿舍，冇人會諗到呢個行為本身就有問題。
另外，嗰陣偶像組合之間嘅競爭超級激烈。 H.O.T.同水晶男孩嘅fans group喺各種公開錄製現場，或演唱會現場，發生肢體衝突嘅事亦好常見。 而且，如果傳出自己鍾意嘅偶像同其他女偶像拍拖，就會嚴重咁反嗰個女偶像。
例如，Baby V.O.X嘅簡美妍同H.O.T.人氣成員文熙俊拍拖嘅消息傳出之後，收到死老鼠屍體、用鮮血寫嘅威脅殺人信件、剃鬚刀等等。 唔係自己鍾意嘅男團，而係女團Fin.K.L攞第一，fans就係喺Fin.K.L表演過程中一直叫「死開！」
第二代偶像
時期：2005年 ~ 2012年
早期代表偶像
男團：東方神起、Super Junior、BIGBANG、 SS501、 SHINee、2PM等
女團：少女時代、Wonder Girls、Kara等
後期代表偶像
男團：BEAST (現 Highlight)、INFINITE、MBLAQ、B1A4等
女團：2NE1、4minute、T-ara、f(x)、Secret、Miss A、Apink、Girl's Day、SISTAR等
由第一代轉去第二代嘅時間非常明確， 因爲引領第一代嘅偶像喺短暫嘅全盛時期後，2000年代初大部分已經解散。 之後5人男子偶像組合「東方神起」喺SM娛樂公司出道，開啓第二代偶像嘅發展。
之後2005年Super Junior、SS501，2006年BIGBANG、2007年少女時代、Wonder Girls、KARA出道，第二代偶像獲得超高人氣。 由嗰個時期開始，大家所知道嘅3大企劃公司：SM、YG、JYP，3大版圖變得越嚟越清晰。
另外，第二代偶像最活躍嘅時期就係韓國偶像市場大幅成長嘅時期，同時唔只偶像fans group，喺普羅大衆之間都好有人氣，例如少女時代2010年嘅《Oh！》 喺韓國最大門戶網站NAVER獨家公開MV預告之後，NAVER嘅伺務器一度陷入癱瘓。
이데일리
而且，鍾意第二代偶像嘅fans group，1990年代以後出生嘅人開始大幅增加，fans group文化發生巨大變化，因爲佢哋熟悉網絡環境，善用Facebook、Twitter等社交媒體。
隨着音樂開始通過數碼音源同串流媒體服務嚟聽，唱片市場大幅削弱。 由嗰陣開始，專輯傾向用嚟收藏，或者表達支持嘅心意。 同以前好唔同，由第二代開始，專輯發行後一星期內嘅銷量，成為咗衡量fans group多少嘅指標。
第二代偶像好自然咁分咗唱片型偶像同音源型偶像。 fans group大，但人氣較弱嘅偶像係唱片型偶像；fans group小，但人氣強嘅偶像就係音源型偶像。一般嚟講，韓國男idol係唱片型偶像，女idol係音源型偶像，不過唔理係屬於邊個組合，第二代偶像組合都得到韓國人嘅喜愛。
擺住大炮型嘅單反相機去追星，被稱為「大炮」嘅fans亦都係喺呢個時期登場。 呢個講法係由SHINee喺SM娛樂出道之後，SHINee嘅fans用大炮影SHINee好高質嘅相同影片開始流行起嚟嘅。
雖然好耐以前就有fans去影偶像，但係影超高畫質嘅相，再用佢哋嘅巧手修圖，同其他fans分享呢個做法係由嗰陣開始興起嘅。就係咁樣，第二代偶像fans文化比以前發展得更加多姿多彩。
第三代偶像
時期：2013年 ~ 2019年
代表偶像
男團：BTS、EXO、Seventeen、NU'EST、VIXX、GOT7、Winner、iKON、Monster X、NCT等
女團：BLACKPINK、TWICE、Red Velvet、AOA、EXID、MAMAMOO、Lovelyz、GFRIEND、Oh My Girl、宇宙少女等
·
隨着第二代偶像活動時期越嚟越長，偶像世代區分開始好難定斷。要定嘅話，就會以2013年EXO走紅，開始進入第三代偶像時代。 因為第二代嘅偶像同時好活躍咁活動，所以唔似第一代隱退、解散後進入第二代咁明確。不過第三代偶像，同第二代嘅偶像都有明顯唔同嘅特徵。
第三代偶像嘅最大特徵可以講係多樣化嘅發展。 第二代偶像活動嘅時候，偶像本身人氣高，所以有好多可以俾佢哋出演嘅電視節目。 而且除咗電視同電台等媒體之外，就冇其他可以消費嘅內容。
但係由第三代開始，YouTube、NAVER V APP等所屬公司自行製作嘅內容引領住偶像市場。 隨着新媒體嘅興起，偶像市場亦產生咗好大嘅影響。
另外，唱片市場嘅大幅發展亦係第三代偶像嘅特徵，被稱為唱片通貨膨脹現象。 東方神起喺2008年打破首賣10萬張嘅記錄之後，到2013年EXO首賣10萬張時成為咗熱話。 目前首賣超過30萬張以上專輯嘅偶像組合有13隊，仲有3位solo嘅idol。 被稱為最頂級偶像嘅BTS，每次發專輯都唔只超過100萬張，仲試過超過200萬張、300萬張。
由第二代開始以首賣作為確認fans group多少嘅指標之後，所屬公司為咗提高首賣，會進行各種宣傳活動，例如推出小卡或明信片等多種隨機週邊產品，或者喺首賣期間舉行大量fans簽名會等等，所以fans會比以前買更多隻碟。
第三代偶像fans group最大嘅特點就係超高參與度。 如果話之前偶像同fans嘅關係分為創作者同消費者，咁從第三代偶像開始，fans group就好似同偶像一齊咁，形成一種職業嘅感覺！
偶像回歸嘅話，為咗佢哋成功嘅fans會開始集體行動，會喺唔同方面幫偶像衝上第一位，簡稱為「總攻」。 通過音源總攻、唱片總攻、投票總攻等努力提高偶像嘅成績。 如果有部分粉絲自發企出嚟引領總攻，剩低嘅fans就係努力咁跟。佢哋會籌集資金，連同滿滿嘅愛一齊去總攻。 呢種方式非常有系統、有組織！
第四代偶像
時期：2019年 ~ 而家
代表偶像
男團：TOMORROW X TOGETHER（TXT）、TREASURE、ENHYPEN、Stray Kids、ATEEZ、THE BOYZ、VERIVERY等
女團：ITZY、aespa、(G)I-DLE、STAYC、NiziU、EVERGLOW等
由2019年開始到而家，稱為第四代偶像。 喺捧紅咗第三代偶像嘅所屬公司出道嘅組合、PRODUCE 101等選秀節目而組成嘅團體等多個偶像團體活躍咁進行活動。 當然亦有人話，因為第三代嘅偶像依然處於最頂尖嘅位置，所以未算踏入第四代，但係偶像市場本來就處於飽和狀態，以最頂層變化嘅方式進行交替，喺一段時間內好難實現，所以喺呢篇文章度小編會將佢哋歸類為第四代。
由第四代偶像開始，受到喺海外強大發展嘅BTS同BLACKPINK影響，有好多由一開始就以全球舞台為目標。 如果話之前係喺國內鞏固地位，成功之後先進軍海外，咁由出道開始就努力走向國際嘅偶像就係第四代嘅特徵。
겟꿀
第四代偶像fans group最大嘅特點係以新嘅網絡社交平台為基礎嘅雙向溝通。 Lysn、Weverse、UNIVERSE等多種手機平台建成之後，實現咗偶像同fans互相溝通。 之前都有以SNS為基礎嘅溝通，但係呢種平台嘅溝通可以令偶像同fans之間關係更加close。fans訂閱咗自己鍾意嘅偶像，每次收到訊息，心情都會變好！
今日小編同大家一齊回顧第一代K-pop偶像到第四代，超過20年歷史，應該了解多咗唔同世代嘅特徵！今後K-pop偶像會點變化呢？真係令人好奇又期待！😉
最後提提大家： 今日小編介紹嘅係大部分人同意嘅區分方法，以佢哋活動最活躍、人氣最高嘅時期為準，請大家留意啊！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
