Hello，大家好，我哋係由韓國人每日提供最新韓國旅行資訊嘅Creatrip。
小編一諗到綠色，就會聯想起大自然，會想像被好多樹木同草包圍嘅森林，令人身心都得到治癒。韓國有好多唔同種類嘅咖啡廳，今日小編就同大家介紹吓「首爾綠色主題」嘅咖啡廳，等大家可以得到治癒嘅感覺。
首爾綠色主題咖啡廳1
店名： CAFE KNOTTED
Instagram：cafeknotted
營業時間：09:00-20:00
地址：서울 강남구 테헤란로103길 9
小Tips：喺三成站8號出口一出，第一個路口左轉就可以到。
呢間冬甩連鎖店而家喺首爾超級爆紅！ 小編朝早比佢哋嘅營業時間早15分鐘去都已經有人排緊隊。
佢哋唔單止有冬甩，仲有好多其他選擇，例如蛋糕、牛角包、司康、布朗尼蛋糕等等。
呢個咁可愛嘅外賣盒可以放到3個冬甩，覺得好食可以再買返屋企。
每個冬甩都係差唔多3,000won左右，價錢都算係幾合理。
整體嚟講，呢度好啲冬甩都算幾好食，口味亦都有好多款可以揀，不過因為太有人氣，可能成日都要排隊。
首爾綠色主題咖啡廳2
店名：TALK NONSENSE
Instagram：talk_nonsense
營業時間：星期一至六12:00 - 22:00、逢星期日休息
地址：서울 동작구 흑석로8길 7
小Tips：由黑石站4號出口行大約9分鐘就會到。
雖然呢間cafe藏身喺小巷入面，不過都好容易就搵到。
大家可以發現到佢哋嘅畫全部都係手工畫！有好多藝術品喺入面，好有藝術氣色。
落樓梯落去之後，就會發現呢個好似秘密天地嘅cafe。
呢度係寵物friendly，所以可以帶寵物一齊嚟，呢度仲在好多關於寵物嘅畫作，鐘意寵物嘅大家就一定要嚟啦！
雖然呢度係位於地下，𣎴過有一個大窗可以透到充足嘅陽光，令到成個氣氛好舒服。
呢度有好多綠色嘅小裝飾，超啱喺度打卡
呢度夜晚仲可以搖身一變，變成酒吧，所以呢度有一個專門放酒嘅雪櫃。
因為呢度係支持環保，所以呢度係用金屬吸管同可以重複使用嘅綠色杯墊。
Muscat Milk Tea (₩5,000)
飲落第一啖就係正常奶茶味，不過之後就會有種提子嘅餘味，係令人好上癮嘅味道。
Thanks Coffee (₩5,000)
有種升級版咖啡嘅感覺，唔係好似平時鮮奶咖啡嘅味道。
Chestnut Pumpkin Cake (₩6,000)
呢個 Chestnut Pumpkin Cake係必點款之一！因為佢好軟滑同埋好重堅果味，所以口感好豐富。
小編好推薦呢一間咖啡廳，充滿藝術性質又有環保意識，又寵物friendly，大家有機會就要嚟呢度。
首爾綠色主題咖啡廳3
店名：CACHI
Instagram：cachi_flowercafe
營業時間：11:00 - 22:00
地址：서울 강남구 봉은사로4길 23 1층
小Tips：新論峴站4號出口行4分鐘就到。
喺距離新論峴站幾分鐘路程嘅小巷入面，就可以見到呢個深綠色嘅小天地，佢哋嘅花同木門都係超級受歡迎！
呢度同上一間cafe一樣，一到夜晚就會搖身一變做酒吧。
呢度除咗係一間cafe之外，同時有個小角落係俾大家可以買花，有興趣嘅朋友都可以喺度睇吓。
小編最後叫咗熱情果玫瑰冰茶同士多啤梨芝士忌廉窩夫。
Herbs & Fruit Handmade Jam In Tea (₩5,700)
呢款茶係有7種口味，全部都係手工制，小編最後叫咗熱情果玫瑰冰茶，唔會太甜，飲嘅時候仲會有種好清新嘅味道。
士多啤梨芝士忌廉窩夫 (₩5,200)
cheese cream同士多啤梨好夾，大家想甜啲仲可以自己落啲糖漿落去。
成間咖啡廳都有好多綠色植物包圍，令人好有治癒嘅感覺。
呢度嘅二樓就係開放俾夜晚當係bar嘅形式去營運。
三樓中間就有一張好大嘅大理石枱，仲有鑲咗金黃色裝飾嘅布質櫈，爲成個空間增添咗唔少優雅感。
如果天氣好，仲可以坐佢哋嘅戶外座位區，坐喺度就可以暫時俾心靈有個少少嘅休息，真係可以喺度坐足成日。
唔知以上三間綠色主題Cafe，大家又會鍾意邊種風格多呢？歡迎大家留言話俾我哋知。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
